BAKI, AzerVoice

İsrail ordusu cümə günü Qəzza şəhərini “təhlükəli döyüş zonası” elan edib. Bu addım, İsrailin HƏMAS-la müharibənin başlamasından təxminən iki il sonra, zolağın ən böyük şəhərinə nəzarəti ələ keçirməyə hazırlaşdığı bir vaxtda atılıb. Bu barədə “Frans Press” məlumat yayıb.

Ordunun sözçüsü Əviçay Adrəi “X” platformasında (keçmiş Twitter) ərəbcə dərc etdiyi açıqlamada bildirib:
“Bu gündən (cümə) saat 10:00-da (Bakı vaxtı ilə 12:00) etibarən, Qəzza şəhəri üçün yerli və müvəqqəti taktiki atəşkəs qüvvədə deyil. Şəhər ‘təhlükəli döyüş zonası’ sayılacaq.”

Bu açıqlama, hər gün müəyyən bölgələrdə BMT və yardım təşkilatlarının humanitar yardımı paylamasını asanlaşdırmaq üçün elan olunan məhdud taktiki atəşkəslərə istinad edir.

Xatırladaq ki, iyulun sonunda İsrail ordusu Qəzza şəhərində və digər bölgələrdə hər gün yerli “taktiki hərbi fəaliyyətin dayandırılması” barədə qərar elan etmişdi. Məqsəd BMT və qeyri-hökumət təşkilatlarının karvanlarının təhlükəsiz şəkildə hərəkətini təmin etmək idi.

İsrail ordusu cümə günü əlavə edib ki, o, “Qəzza zolağında humanitar səylərə dəstək verməyə davam edəcək, eyni zamanda quru manevrləri və terror təşkilatlarına qarşı hücum əməliyyatlarını da sürdürəcək.”

Qəzza Mülki Müdafiə Xidməti isə cümə günü açıqlama verərək, sübh çağıdan bəri zolaqda 33 nəfərin həlak olduğunu bildirib.

Beynəlxalq və yerli təzyiqlərin İsraildən müharibəni dayandırmağı tələb etməsinə baxmayaraq, ordu cümə axşamı bəyan edib ki, qüvvələri “Qəzza zolağının bütün ərazilərində əməliyyatlarını davam etdirir.”

Çərşənbə günü isə ordunun başqa bir açıqlamasında, Qəzza şəhərinin sakinlərinin köçürülməsinin “qaçılmaz” olduğu vurğulanmışdı. Avqustun əvvəlində İsrail hökuməti şəhərə tam nəzarəti ələ keçirmək planını təsdiqləmişdi.