BAKI, AzerVoice, Nərmin Ağayeva
İsrail ordusu Qəzza şəhərində “qalmaqallı işğal planı”nın birinci mərhələsinə start verdiyini elan edib.
AzerVoice xəbər verir ki, Təl-Əviv hökuməti bugün Qəzza zolağında işğal planının ilkin əməliyyatlarına başladığını rəsmən açıqlayıb. İsrail ordusunun bəyanatına görə, Qəzza şəhərinin kənarında genişmiqyaslı əməliyyatlar aparılır və hücumun ilk mərhələləri davam edir.
Bu əməliyyatlar çərçivəsində İsrail ordusu Qəzza şəhərini mühasirəyə almaq və HƏMAS-ın nəzarətindəki ərazilərə daxil olmaq məqsədi daşıyır. Əməliyyatların detalları ilə bağlı rəsmi məlumatlar məhdud olsa da, sosial şəbəkələrdə və xəbər mənbələrində Qəzza şəhərində intensiv bombardmanların olduğu bildirilir.
Qeyd edək ki, Beynəlxalq təşkilatlar bu əməliyyatların Qəzzada humanitar böhranı daha da ağırlaşdıra biləcəyi barədə xəbərdarlıq edib. BMT-nin baş katibi Antonio Guterres hücumların “kütləvi dağıntı və mülki itkilərə” səbəb ola biləcəyini qeyd edərək, tərəfləri təmkinli olmağa çağırıb.