BAKI, AzerVoice, Nərmin Ağayeva
ABŞ-ın kosmik nəqliyyat şirkəti SpaceX, İlon Maska məxsus Starship raketinin 10-cu sınaq uçuşunu uğurla həyata keçirib
AzerVoice xəbər verir ki, dünyanın ən güclü kosmik raketi kimi tanınan Starship, Texas ştatındakı Starbase-dən yerli vaxtla 18:30-da buraxılıb.
Səkkiz süni Starlink peykini daşıyan raketin birinci mərhələ gücləndiricisi Super Heavy, buraxılışdan sonra Meksika körfəzinə planlaşdırıldığı kimi enib. Starship, səkkiz süni peyki orbitə yerləşdirmək və Raptor mühərrikini kosmosda yenidən işə salmaq missiyalarını uğurla icra edib. Raket buraxılışdan təxminən bir saat sonra Hind okeanına enib.
Qeyd edək ki, Starship-in son üç sınağı (yeddinci, səkkizinci və doqquzuncu) uğursuz olub. Yeddinci və səkkizinci sınaqlarda raket buraxılışdan 10 dəqiqə sonra havada parçalanıb, doqquzuncuda isə 30 dəqiqə sonra əlaqə kəsilib. Texniki nasazlıqlar və hava şəraiti səbəbindən 10-cu sınaq iki dəfə təxirə salınıb. Bu uçuş, SpaceX-in Mars və Ay missiyaları üçün nəzərdə tutulan Starship-in inkişafında mühüm addım kimi qiymətləndirilir.