BAKI,VOA,Yusif Şərifzadə

ABŞ Ali Məhkəməsi Texas ştatında tətbiq mağazaları və proqram təminatı hazırlayan şirkətlər üçün istifadəçilərin yaşının yoxlanılmasını tələb edən qanunun qüvvəyə minməsinin qarşısını almaqdan imtina edib.

VOA xəbər verir ki, Ali Məhkəmə qanunun məhkəmə araşdırmaları davam etdiyi müddətdə qüvvədə qalmasına qərar verib. Qanuna əsasən, azyaşlı istifadəçilər tətbiq yükləmək və ya tətbiqdaxili alış-veriş etmək üçün valideynlərinin razılığını almalıdırlar.

Qanundan narazı qalan Kompüter və Rabitə Sənayesi Assosiasiyası, eləcə də Texas ştatında fəaliyyət göstərən tələbələr birliyi və iki tələbə məhkəməyə müraciət edərək sənədin söz azadlığını pozduğunu iddia ediblər. Assosiasiyanın üzvləri arasında Apple və Google kimi iri texnologiya şirkətləri də yer alır.

Bu iş Texas ştatının uşaqların internetdə qarşılaşa biləcəyi zərərli məzmundan qorunmasına yönəlmiş tədbirləri ilə bağlı növbəti hüquqi mübahisə hesab olunur.

Qeyd edək ki, ABŞ Ali Məhkəməsi ötən il də yetkinlər üçün nəzərdə tutulan internet saytlarında yaşın təsdiqlənməsini tələb edən oxşar qanunu qüvvədə saxlamışdı və həmin qərarda böyüklərin söz azadlığının pozulduğu barədə iddiaları qəbul etməmişdi.