BAKI, AzerVoice
Fransa ilə İsrail arasında gərginlik artmaqdadır. Dünən, Parisin Fələstin dövlətini tanımaq qərarından sonra İsrailin Baş naziri Benyamin Netanyahu Fransa prezidenti Emmanuel Makronu “antisemitizmi qızışdırmaqda” ittiham edib. Bu bəyanata cavab olaraq Fransanın rəsmi dairələri Netanyahunun sözlərini “alçaq və saxtakar” adlandırıb.
Netanyahu Makrona ünvanladığı məktubda Fransa hökumətinin qərarını “antisemitizmin alovunu körükləyən addım” kimi dəyərləndirib:
“Fələstin dövlətinin tanınması çağırışınız antisemitizmin oduna benzin tökür. Bu diplomatiya deyil, güzəştdir. Siz Hamas terrorunu mükafatlandırırsınız, girovların azad edilməsini çətinləşdirirsiniz və Fransa yəhudilərinə qarşı təhdidləri artırırsınız,” – deyə Netanyahu bildirib.
O, Fransa hakimiyyətini “zəiflik əvəzinə qətiyyət göstərməyə” çağırıb və bunun üçün də konkret tarix göstərib: 23 sentyabr – Yəhudi təqviminə görə yeni il ərəfəsi. Bu tarix BMT Baş Assambleyasının da yekun gününə təsadüf edir.
Elize sarayı yayımladığı bəyanatda Netanyahunun fikirlərini “əsassız, alçaq və qəbuledilməz” adlandırıb:
“Fələstin dövlətini tanımaq qərarını antisemit zorakılıqlarının artması ilə əlaqələndirmək saxtakarlıqdır və buna cavabsız qalmayacaq. Fransa Respublikası həmişə yəhudi vətəndaşlarını qoruyub və qoruyacaq,” – bəyanatda qeyd olunub.
Makron ötən ay açıqlamışdı ki, Paris sentyabrda Fələstin dövlətini rəsmən tanıyacaq. Bu qərar İsrailin sərt etirazına səbəb olub. Ardınca Kanada, Avstraliya, Andorra, Finlandiya, İslandiya, İrlandiya, Lüksemburq, Malta, Yeni Zelandiya, Norveç, Portuqaliya, San-Marino və Sloveniya da oxşar addım atacaqlarını bəyan ediblər.
Netanyahu oxşar məktubu avqustun 17-də Avstraliyanın baş naziri Antoni Albaniziyə də göndərib. O, həmçinin məktubunda ABŞ-ın sabiq prezidenti Donald Trampı “antisemitizmə qarşı mübarizənin nümunəsi” adlandırıb.
Netanyahu son günlər Fransada yəhudi icmasına qarşı zorakılıqları – “El Al” şirkətinin ofislərinə hücum, Parisdə bir yəhudinin döyülməsi, habelə hahamlara edilən hücumları sadalayaraq, bunları “epidemiya” kimi dəyərləndirib.
Elize sarayının bəyanatında bildirilib: “Yəhudi icmasına qarşı hər cür zorakılıq qəbuledilməzdir. Prezident 2017-ci ildən bəri hökumətlərdən antisemitizmə qarşı ən sərt tədbirlər görməsini tələb edib.”
Fələstin XİN Netanyahunun Makrona qarşı ittihamlarını “əsassız və sülhə qarşı yönəlmiş” adlandırıb.