BAKI, AzerVoice, Səməd Əyyubov

Avropa İttifaqı (Aİ) bəyan edib ki, İsrail və Fələstin ərazilərində beynəlxalq hüquqa uyğun olaraq tərəflərin razılığı olmadan aparılan istənilən ərazi dəyişikliyi qəbul edilmir.

AzerVoice-un məlumatına görə, bu barədə Aİ-nin ali diplomatı Kaya Kallasın rəsmi nümayəndəsi Anitta Hipper Brüsseldə keçirilən brifinqdə bildirib.

O qeyd edib ki, tərəflər arasında siyasi razılaşmanın bir hissəsi olmayan bütün ərazi dəyişiklikləri rədd edilir və beynəlxalq hüquqa görə ərazilərin ilhaqı qanunsuz hesab olunur.

Hipper bu fikirləri, İsrailin baş naziri Benyamin Netanyahunun televiziya müsahibəsində səsləndirdiyi “Böyük İsrail” ideyasına münasibət bildirərkən söyləyib.

Xatırladaq ki, İsrailin baş naziri Benyamin Netanyahu, işğal altındakı Fələstin torpaqlarını da əhatə edən “Böyük İsrail” planına sadiq olduğunu bəyan edib və bunu “tarixi və mənəvi missiya” adlandırıb.

“Böyük İsrail” anlayışı bəzi sionistlər, o cümlədən Sionist Revizionist hərəkatının qurucusu və hakim “Likud” partiyasının ideya müəllifi hesab edilən Zeev Jabotinski tərəfindən müasir İsrail dövləti ilə yanaşı, Qəzza zolağı, İordan çayının qərb sahili və İordaniyanın müəyyən ərazilərini əhatə edən konsepsiya kimi istifadə olunur.