BAKI, AzerVoice
İsrailin Qəzzanın bəzi bölgələrinə humanitar yardımın havadan endirməsi aldadıcı bir addımdır.
AzerVoice xəbər verir ki, bu sözlər HƏMAS-ın verdiyi bəyanatda yer alıb.
"İsrailin Qəzzanın bəzi bölgələrinə havadan yardım endirməsi yalnız formal və aldatıcı bir addımdır. Məqsəd beynəlxalq ictimaiyyətin gözünü aldatmaq, özünü daha yaxşı göstərmək və Fələstin xalqının mühasirədən çıxmaq hüququ, eləcə də beynəlxalq ictimaiyyətin və azad xalqların aclıq siyasətinin dayandırılması tələblərini boğmaqdır” - deyə, bəyanatda qeyd olunub.
Bəyanatda həmçinin vurğulanıb ki, Qəzza zolağına təcili şəkildə ərzaq, dərman və humanitar yardımın çatdırılması qanuni bir hüquqdur. HƏMAS, İsrailin havadan yardım endirmə planını "aclıq siyasətinin idarə edilməsi" kimi dəyərləndirib.
“İşğalçının (İsrailin - red.) havadan yardım endirmə və tək tərəfli ‘humanitar dəhlizləri’ nəzarətdə saxlamaq planı, aclıq siyasətini bitirmək deyil, onu idarə etmək niyyəti daşıyır. Qəzza zolağında bu vəhşi aclıq cinayətinə son qoymağın yeganə yolu hücumların dayandırılması, tətbiq edilən cinayətkar mühasirənin tam şəkildə qaldırılması, humanitar yardımın tam və davamlı şəkildə quru keçidlər vasitəsilə daxil olmasının təmin olunması və BMT tərəfindən tanınmış mexanizmlərlə vətəndaşlara çatdırılmasının təmin edilməsidir” - deyə, bəyanatda bildirilib.
HƏMAS son olaraq vurğulayıb ki, İsrailin Baş naziri Benyamin Netanyahunun başçılıq etdiyi hökümət, atdığı atdımlarla minlərlə insanın ölümünə və yaralanmasına səbəb olub.
“Müharibə canisi Netanyahu hökumətinin yardımlar üzərində qeyri-insani nəzarət və aclığın idarə olunması ilə bağlı atdığı addımlar, nəticədə mindən çox insanın ölümünə və 6 minə yaxın insanın yaralanmasına səbəb olub” - deyə, bəyanatda qeyd olunub.
Qeyd edək ki, İsrailin 2023-cü il oktyabrın 7-dən bəri davam edən hücumları, intensiv bombardmanlar və blokada nəticəsində Qəzzada ağır humanitar fəlakət yaşanır. Beynəlxalq ictimaiyyətin və BMT-nin atəşkəs çağırışlarına baxmayaraq, vəziyyət pisləşməkdədir.