BAKI, AzerVoice
Ukrayna Prezidenti Volodimir Zelenski tərəfindən imzalanan və Milli Antikorrupsiya Bürosu (NABU) ilə Xüsusi Antikorrupsiya Prokurorluğunun (SAP) müstəqilliyini faktiki olaraq ləğv edən qanuna qarşı Kiyevdə etiraz aksiyası keçirlir.
AzerVoice xəbər verir ki, bu barədə UNIAN agentliyi məlumat yayıb.
Etirazçılar İvan Franko adına teatrın qarşısındakı meydanda toplaşıblar. Toplaşan insanlar “NABU və SAP-dan əlinizi çəkin!” şüarları səsləndirirlər.
Qeyd edək ki, dünən keçirilən aksiyada müxtəlif qiymətləndirmələrə görə 1000-2000 arası insan iştirak edib. Aksiyaya Kiyev meri Vitali Kliçko da qatılıb.
Bu cür etiraz aksiyaları ölkənin digər şəhərlərində də keçirilir. Bu şəhərlər arasında Dnepr, Jitomir, Krivoy Roq, Kropivnitski, Lvov, Nikolayev, Odessa, Rovno, Ternopol, Xarkov, Xmelnitski, Çerniqov və Çernovtsı da var.
Xatırladaq ki, ötən gün Ukrayna Ali Radası bu iki qurumun fəaliyyətini məhdudlaşdıran qanun layihəsini qəbul edib. Zelenski bu qanunu imzalayıb. Yeni qanuna əsasən, NABU və SAP artıq Baş Prokurorun qərarlarından asılı vəziyyətə düşür. Baş prokuror NABU-nun bütün istintaq işlərinə çıxış əldə edir, detektivlərə icrası məcburi göstərişlər verə və işlər üzrə istintaq səlahiyyətini dəyişə bilər.
NABU və SAP-a qarşı təzyiqlər bu qurumların bəzi əməkdaşlarına qarşı dövlətə xəyanət, Rusiya ilə əlaqələr və korrupsiya şübhələri ilə izah olunur.
"Financial Times" nəşrinin məlumatına görə, Fransa prezidenti Emmanuel Makron və Avropa Şurasının rəhbəri Antoniu Koşta Zelenski ilə əlaqə saxlayaraq onu bu qanuna dair qərarını yenidən nəzərdən keçirməyə çağırıblar.