BAKI, AzerVoice

ABŞ-ın nümayəndəsi Tom Barrak bu gün Livanın paytaxtı Beyruta gəlib.

AzerVoice xəbər verir ki, bu barədə diplomatik mənbələr məlumat verib.

Məlumata görə, səfərin məqsədi, Livanın, ABŞ-ın təqdim etdiyi və silahların yalnız dövlətin ixtiyarında olmasını nəzərdə tutan sənədə dair ilkin cavabına ABŞ-ın verdiyi şərhlərə cavab olaraq hazırladığı ikinci cavabı təhvil almaqdır.

Bildirilib ki, Livan tərəfindən hazırlanmış cavab və şərhlər demək olar ki, tam hazırdır və onların Barraka sabah təqdim olunacağı planlaşdırılırdı. Lakin amerikalı diplomatik nümayəndənin niyə əvvəlcədən gəldiyi hələlik bəlli deyil.

Son günlər ərzində prezident administrasiyası, parlament sədri və hökumət rəhbərliyini təmsil edən nümayəndələr, eləcə də təhlükəsizlik üzrə ekspertlərdən ibarət komissiyanın üzvləri arasında intensiv görüşlər keçirilib.

Hizbullahın mövqeyi ilə rəsmi dövlət mövqeyi arasındakı fərqlə bağlı suala cavab olaraq mənbələr bildiriblər ki, Livan dövləti Barraka silahların dövlətin ixtiyarında olmasını təsdiqləyən bir cavab təqdim edəcək. Cavabda, həmçinin, BMT-nin 1701 saylı qətnaməsinin tam şəkildə tətbiqi, İsrailin işğal etdiyi torpaqlardan geri çəkilməsi, İsrailin təxribatlarının dayandırılması, livanlı əsirlərin azad edilməsi və sakinlərin öz kəndlərinə qayıtması məsələləri vurğulanacaq.

Qeyd edək ki, Hizbullahın baş katibinin müavini Naim Qasim, Barrakın səfərindən əvvəl cümə axşamı gecəsi verdiyi bəyanatda, silahların yalnız dövlətin ixtiyarında olması tələbinə qarşı çıxaraq bunu “varlıq üçün təhlükə” adlandırmış və bu təhlükə aradan qaldırılmadan “milli təhlükəsizlik strategiyası”na dair müzakirələrə başlamağın mümkün olmadığını bildirmişdi.