BAKI, AzerVoice
ABŞ Prezidenti Donald Tramp bildirib ki, əgər Tehran yeni nüvə obyektlərini inşa etmək qərarına gəlsə, həmin obyektlər məhv ediləcək.
AzerVoice xəbər verir ki, bu barədə o, "Truth Social" platformasında yazıb.
“İranın üç nüvə obyekti tamamilə məhv edilib. Onların fəaliyyətini bərpa etmək üçün illərlə vaxt lazım olardı. Bu obyektləri bərpa etməkdənsə, yenilərini tikmək daha asan olardı – əgər İran bu qərarı versəydi” – deyə Tramp vurğulayıb.
Bundan əvvəl, "NBC News" telekanalı mənbələrə istinadla məlumat vermişdi ki, ABŞ-ın iyun ayında zərbə endirdiyi üç nüvə obyektindən yalnız biri demək olar ki, tamamilə dağıdılıb. Mənbələrin sözlərinə görə, digər iki obyektə daha az ziyan dəyib və əgər Tehran müvafiq qərar versə, yaxın aylarda bu obyektlərdə zənginləşdirmə işləri yenidən başlaya bilər. Ağ Ev isə bu qiymətləndirmələri rədd edib. Ağ Evin mətbuat katibinin müavini Anna Kelli bildirib ki, ABŞ-ın zərbələri İranın nüvə potensialının “tamamilə məhv edilməsinə” gətirib çıxarıb.
Digər tərəfdən, ABŞ kəşfiyyatı hesab edir ki, endirilən zərbələr İranın nüvə proqramının əsas komponentlərini məhv etməyib. ABŞ Müdafiə Nazirliyinin Kəşfiyyat İdarəsinin ilkin qiymətləndirməsinə görə, bu hücumlar Tehranın nüvə bombasına sahib olmasını sadəcə bir neçə ay təxirə salıb. Bununla belə, idarə bu nəticələrin dəqiqliyinə aşağı inam səviyyəsi ilə yanaşıldığını da qeyd edib.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək rütbəli hərbçi, o cümlədən İran Silahlı Qüvvələrinin Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər həlak olub. İran BMT Təhlükəsizlik Şurasının hadisə ilə əlaqədar fövqəladə iclas çağırılmasını istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.