BAKI, AzerVoice
ABŞ-ın Texas ştatında baş verən güclü daşqın nəticəsində həlak olanların sayı 129 nəfərə yüksəlib.
AzerVoice xəbər verir ki, bu barədə "ABC News" telekanalı məlumat yayıb.
Məlumata görə, təbii fəlakətdən ən çox zərər çəkən ərazi Kerr dairəsi olub – burada 103 nəfər həlak olub, onlardan 36-sı uşaqdır. Hazırda 170-dən çox insan itkin düşmüş hesab olunur.
Qeyd edək ki, ABŞ Prezidenti Donald Tramp Texası bir neçə gün əvvəl ziyarət edib. 6 iyul tarixində o, Kerr dairəsində fövqəladə vəziyyət elan edib. Tramp bildirib ki, federal hakimiyyət orqanları daşqının nəticələrinin aradan qaldırılmasında yerli xidmətlərə kömək göstərir.
Xatırladaq ki, bu miqyasda sonuncu daşqın ötən ilin sentyabrında baş vermişdi. Həmin vaxt baş verən qasırğa nəticəsində Corciya, Şimali və Cənubi Karolina və Florida ştatlarında çaylar məcrasından çıxmış, 230-dan çox insan həlak olmuşdu.