BAKI, AzerVoice

Kolumbiya Universiteti ABŞ Prezidenti Donald Tramp administrasiyası ilə razılaşma əldə etməyə hazırdır.

AzerVoice xəbər verir ki, bu razılaşma ali təhsil müəssisəsinin federal maliyyələşdirmənin bir hissəsinə yenidən çıxışını təmin edəcək.

Xatırladaq ki, mart ayında ABŞ hakimiyyəti Kolumbiya Universitetinə təxminən 400 milyon dollar həcmində federal qrantların ayrılmasını müvəqqəti dayandırmaq qərarı vermişdi. Səbəb kimi universitet rəhbərliyinin yəhudi mənşəli tələbələrin təqibinə qarşı kifayət qədər tədbir görməməsi göstərilmişdi.

Ötən həftə universitetin İdarə Heyəti federal hakimiyyətlə mümkün razılaşmanın şərtlərini müzakirə edib. Gözlənilir ki, Kolumbiya Universiteti vətəndaş hüquqlarının pozulmasından zərər çəkmiş şəxslərə çoxmilyonluq kompensasiya ödəyəcək, işə qəbul prosesini daha şəffaf edəcək, Trampın tənqid etdiyi "müxtəliflik, bərabərlik və inklüzivlik" (DEI) siyasətinə yanaşmanı dəyişəcək və yəhudi mənşəli tələbələrin təhlükəsizliyini artıracaq tədbirlər görəcək. Əvəzində universitetə 400 milyon dollardan çox federal maliyyələşməyə çıxış hüququ geri qaytarılacaq.

Gələn həftə universitetin nümayəndələri və Tramp administrasiyasının rəsmiləri Ağ Evdə razılaşmanı müzakirə edəcəklər. Razılaşmanın şərtləri hələ tam təsdiqlənməyib və dəyişdirilə bilər. ABŞ hakimiyyəti bu razılaşmanın digər ali məktəblərlə bağlanacaq oxşar sazişlər üçün nümunə olacağını gözləyir.