BAKI, AzerVoice
ABŞ dövlət katibi Marko Rubio bildirib ki, hazırda ABŞ Prezidenti Donald Tramp ilə Rusiya Prezidenti Vladimir Putin arasında yüksək səviyyəli görüş planlaşdırılmır.
AzerVoice xəbər verir ki, bu barədə Rubio Malayziyada keçirilən ASEAN sammiti çərçivəsində Rusiya xarici işlər naziri Sergey Lavrovla apardığı danışıqlardan sonra jurnalistlərə açıqlamasında bildirib.
“Xeyr, hazırda belə bir sammit nəzərdə tutulmur” – deyə, Rubio qeyd edib.
O vurğulayıb ki, Vaşinqton Moskva ilə əlaqələri davam etdirmək üçün mövcud olan hər bir imkandan istifadə etməyə hazırdır. Diplomatın sözlərinə görə, ABŞ və Rusiya arasında əlaqələrin saxlanılması vacibdir.
Rubio həmçinin qeyd edib ki, Vaşinqton Ukrayna böhranının dinc yolla həlli üçün potensial görür və bu səbəbdən də prosesə öz töhfəsini vermək istəyir.