BAKI, AzerVoice

ABŞ-ın Rusiyaya qarşı yeni sanksiyaların tətbiqi ilə bağlı qərarı ABŞ Prezidenti Donald Tramp özü şəxsən verəcək.

AzerVoice xəbər verir ki, bu barədə ABŞ dövlət katibi Marko Rubio Cənub-Şərqi Asiya Dövlətləri Assosiasiyası (ASEAN) çərçivəsində xarici işlər nazirlərinin görüşündən sonra jurnalistlərin suallarını cavablandırarkən bildirib.

“Prezidentin də qeyd etdiyi kimi, bu, onun səlahiyyətləri çərçivəsində mövcud olan variantlardan biridir. Amma bu, ilk növbədə Senat və Nümayəndələr Palatasının müvafiq qanun layihəsini qəbul etməsinə bağlıdır” – deyə, o qeyd edib.

“Biz Konqreslə birlikdə qanun layihəsinin necə olacağı üzərində işləyirik. Aydındır ki, prezidentin sanksiyaları nə zaman və necə tətbiq edəcəyi ilə bağlı qərar verməkdə elastikliyə ehtiyacı var, çünki bu, ona istənilən danışıqlarda maksimum təsir imkanları verir. Sanksiyaların tətbiqi üçün zamanın gəlib-gəlmədiyinə qərar vermək prezidentin ixtiyarındadır” - deyə, Rubio əlavə edib.

Onun sözlərinə görə, ABŞ tərəfi bir neçə həftə əvvəl Rusiyaya sanksiyaların tətbiqi ehtimalının yaxın olduğunu çatdırıb. “Biz bunu deməyə davam edəcəyik, çünki reallıq budur” – deyə, o bildirib.

ABŞ dövlət katibi həmçinin bildirib ki, Tramp “daha böyük irəliləyişin əldə olunmamasından məyusdur” və Konqresin hər iki palatası Rusiyaya qarşı yeni sanksiyalar üzərində işləməyə hazırdır.