BAKI, AzerVoice

Qəzzada Şifa xəstəxanası elektrik enerjisiz qalıb – səhiyyə sistemi tam çökmək üzrədir.

AzerVoice xəbər verir ki, Qəzza zolağında yanacaq çatışmazlığı səbəbindən Şifa Tibb Kompleksinin bir sıra bölmələrində elektrik enerjisinin kəsilməsi xəstələr və yaralılar üçün fəlakətli nəticələrə səbəb ola bilər.

Fələstin hökumətinin media ofisinin rəhbəri İsmayıl əl-Savabite Anadolu Agentliyinə açıqlamasında, vəziyyəti "insanlığa qarşı cinayət" adlandırıb və bunun İsrailin blokadasının və tibbi təchizatlara qoyulan məhdudiyyətlərin doğurduğu sağlamlıq böhranının miqyasını ortaya qoyduğunu bildirib.

Əl-Savabite qeyd edib ki, Qəzzanın ən böyük xəstəxanası olan Şifa, hələ də çətin şəraitdə fəaliyyətini davam etdirən cəmi beş dövlət xəstəxanasından biridir. O əlavə edib ki, ümumilikdə 16 dövlət xəstəxanasından yalnız beşi qismən işləyir, digərləri isə ya birbaşa hədəfə alınıb, ya da təchizatın qarşısı alınıb və fəaliyyətlərini dayandırmaq məcburiyyətində qalıb.

O, səhiyyə sisteminin artıq çökmə astanasında olduğunu bildirərək, dərman və tibbi ləvazimat çatışmazlığının fəlakətli səviyyəyə çatdığını vurğulayıb. Əl-Savabite həmçinin bildirib ki, bütün xəstəxanalar hazırda sonuncu yanacaq partiyasından istifadə edir və bu ehtiyatlar 48 saat belə kifayət etmir.

Qeyd edək ki, iyulun 7-də Əqsa Şəhidləri Xəstəxanası əsas generatorun dayanması və yanacağın tükənməsi səbəbindən fəaliyyətini tamamilə dayandırıb. Bu hadisə Qəzza səhiyyə sisteminin tam çökməsi və minlərlə xəstə və yaralının həyati təhlükə ilə üz-üzə qalmasının xəbərdaredici əlaməti kimi dəyərləndirilir.

Əl-Savabite beynəlxalq ictimaiyyəti təcili şəkildə müdaxilə etməyə və səhiyyə sektorunun çöküşünün qarşısını almağa çağırıb.