BAKI,VOA Orxan Qədirzadə

İsrail ordusu Qəzza zolağında saxlanılan fələstinli əsirin qeyri-insani rəftara məruz qalmasını əks etdirən sosial şəbəkələrdə yayılan görüntünün həqiqi olduğunu təsdiqləyib.

İsrail ordusunun adının açıqlanmadığı nümayəndəsi bildirib ki, son 24 saat ərzində yayılan və Qəzzədən olan bir şəxsin gözləri bağlı, əlləri bağlanmış, çarpayıya bərkidilmiş və kürəyinə dəmir çubuq bağlanmış vəziyyətdə göründüyü görüntü real hadisəni əks etdirir.

Ordunun açıqlamasına əsasən, hadisə ilə bağlı komandanlıq səviyyəsində araşdırma aparılır və araşdırmanın nəticələrindən asılı olaraq məsul şəxslər barəsində müvafiq tədbirlər görüləcək.

İsrail Ordusu Radiosu da gözləri bağlı, əlləri bağlanmış və üzüaşağı vəziyyətdə çarpayıya bərkidilmiş fələstinli əsirin fotosunu yayımlayıb. Hadisənin dəqiq yeri və başvermə tarixi barədə isə məlumat verilməyib.

Yayılan görüntü İsrail həbsxanalarında saxlanılan fələstinli məhbusların saxlanma şəraiti və onlara qarşı rəftarla bağlı müzakirələri yenidən gündəmə gətirib.

Məlumata görə, bir neçə gün əvvəl israilli hərbçi Cozef Benamu həmin fotonu sosial şəbəkədə paylaşsa da, sonradan silib və şəxsi hesabındakı profil şəklini də dəyişdirib. Buna baxmayaraq, görüntü qısa müddətdə geniş yayılıb.

İsrailin "Sükutu Pozmaq" təşkilatı hadisəyə münasibət bildirərək yayılan görüntünü "dəhşətli" adlandırıb. Təşkilatın açıqlamasında bildirilib ki, fotoda fələstinli əsir qəsdən alçaldıcı və təhqiredici şəkildə saxlanılır, paylaşımın üzərində isə ivrit dilində "Sabahınız xeyir" ifadəsi yazılıb.

Təşkilat həmçinin İsraili işgəncəni sistemli siyasət kimi tətbiq etməkdə ittiham edib. Açıqlamada qeyd olunub ki, daha əvvəl fələstinli məhbusa işgəncə verməkdə ittiham olunan bəzi hərbçilər, ağır bədən xəsarətlərini əks etdirən sübutlara baxmayaraq, yenidən xidmətə qaytarılıblar.

"Sükutu Pozmaq" təşkilatı bildirib ki, bu hadisə araşdırılan azsaylı işgəncə iddialarından yalnız biridir. Təşkilatın məlumatına görə, 2023-cü ilin oktyabrından bəri İsrailin saxlanma mərkəzlərinə diri gətirilən 100-dən çox fələstinlinin cəsədi sonradan ailələrinə təhvil verilib.

Fələstinli məhbuslarla məşğul olan təşkilatların məlumatına əsasən, hazırda İsrail həbsxanalarında təxminən 9 min 500 fələstinli saxlanılır. Onların arasında qadınlar, uşaqlar və inzibati qaydada həbs olunan şəxslər də var. Həmin təşkilatlar İsraili məhbuslara qarşı işgəncə verməkdə, onları aclığa məruz qoymaqda və tibbi yardımdan məhrum etməkdə ittiham edirlər.