BAKI,VOA,Yusif Şərifzadə

İsrail ordusu sosial şəbəkələrdə yayılan və Qəzza zolağında bir fələstinlinin əlləri bağlı, gözləri örtülü vəziyyətdə göstərildiyi görüntülərin həqiqi olduğunu təsdiqləyib. Hadisə ilə bağlı daxili araşdırmaya başlanıldığı bildirilib.

VOA xəbər verir ki, İsrail ordusunun yaydığı açıqlamada hadisənin müəyyən edildiyi və məsələ ilə bağlı komandanlıq səviyyəsində araşdırma aparıldığı qeyd olunub. Bildirilib ki, araşdırmanın nəticələrinə uyğun olaraq hadisədə iştirak edən şəxslər barədə müvafiq qərarlar qəbul ediləcək.

Yayılan görüntülərdə bir fələstinlinin əllərinin bağlandığı, çarpayıya bağlandığı, gözlərinin örtüldüyü və belinə uzun dirək bərkidildiyi görünür.

Bununla yanaşı, fələstinli keçmiş məhbuslar və insan hüquqlarını müdafiə edən təşkilatlar uzun illərdir İsrailin saxlanılma yerlərində fələstinlilərə qarşı fiziki və psixoloji zorakılıq halları ilə bağlı iddialar irəli sürürlər.

İsrail tərəfi görüntülərin həqiqi olduğunu təsdiqləsə də, hadisənin başvermə şəraiti və araşdırmanın nəticələri barədə hələlik əlavə məlumat açıqlamayıb.