BAKI, AzerVoice

ABŞ sahillərində batmış yük gəmisindəki yanğın nəticəsində 3000-dən çox avtomobil su altında qalıb.

AzerVoice xəbər verir ki, ABŞ Sahil Mühafizəsinin məlumatına əsasən, iyunun 3-də Çin-Meksika marşrutu üzrə hərəkət edən və Liberiya bayrağı altında üzən “Morning Midas” adlı yük gəmisində yanğın baş verib. Yanğından sonra gəmi ekipajı təcili yardım çağırışı edib.

Hadisə yerinə yanğınsöndürmə və xilasetmə qrupları yalnız bir həftə sonra çata bilib. 22 nəfərlik ekipaj təhlükəsiz şəkildə təxliyə edilsə də, yanğını söndürmək mümkün olmayıb. Gəmi üç həftə dənizdə sürükləndikdən sonra Alyaskanın Adak şəhərindən 720 kilometr cənub-qərbdə batıb.

Uzunluğu 182 metr olan gəmidə 3048 avtomobil suya qərq olub. Batma nəticəsində gəmi təxminən 5000 metr dərinliyə enib.

Hadisə ilə bağlı gəminin operatoru olan, Londonda qeydiyyatda duran “Zodiac Maritime” şirkəti araşdırmalara başlayıb. Məlumata görə, gəmidə 1800 ton yanacaq olub və mümkün yanacaq sızması Şimali Sakit okean regionunda dəniz naviqasiyasına təhlükə yarada bilər.

ABŞ Sahil Mühafizəsinin Qərbi Alyaska və Arktika Bölgəsi komandiri Kristofer Kulpepper qeyd edib ki, “Zodiac Maritime” ilə birgə çirklənmə risklərinə qarşı mübarizə tədbirləri görülür.

Qeyd edək ki, ilkin ehtimallara əsasən, yanğının səbəbi gəmidəki elektrik avtomobilləri ola bilər.