BAKI, AzerVoice
Macarıstanın Baş naziri Viktor Orban, Rusiyanın NATO üçün təhlükə yaradacaq qədər güclü olmadığını bildirərək, alyansın Ukraynada 'heç bir işi olmadığını' müdafiə edib
AzerVoice xəbər verir ki, Orban bu fikirləri Niderlandın Haaqa şəhərində keçirilən NATO Zirvəsinin son günündə, jurnalistlərin suallarını cavablandırarkən səsləndirib.
Avropa üçün ən böyük təhlükənin nə olduğu ilə bağlı sualı cavablandıran Orban deyib:
"Avropanın ən böyük təhlükəsi rəqabət qabiliyyətini itirməsidir. Əsl təhlükə təhlükəsizliklə deyil, iqtisadiyyatla bağlıdır. Qlobal ticarətdə rəqabət gücümüzü itiririk, əsas problem budur."
“Qlobal təhlükəsizliyin bir şəxsin eqosuna – ABŞ Prezidenti Donald Trampa – bağlı olması sizi narahat etmir?” sualına cavab olaraq isə Orban belə deyib:
"Tramp kifayət qədər sağlam düşüncəyə sahib bir insandır. Bunu son vaxtlar İranla İsrail arasında baş verən qarşıdurmada göstərdiyi idarəetmədə açıq şəkildə gördünüz. O, məntiqli biridir. Bu da o deməkdir ki, müharibələr artıq daha qısa sürür və əvvəlki münaqişələrin yanacağı tükənir – bu, onun fəaliyyətlərinin nəticəsidir."
Orban, NATO müttəfiqləri üçün müdafiə xərclərinin ÜDM-in 5 faizi səviyyəsinə qaldırılması ilə bağlı yeni hədəfə də münasibət bildirib və bildirib ki, bu, Avropa İttifaqının büdcə qaydalarının yenidən nəzərdən keçirilməsini tələb edir:
"Mövcud qaydalar olduğu müddətdə, Aİ-də heç kim bu 5 faizlik tələbi yerinə yetirə bilməz – nə qədər istəsələr də. Ona görə də hər şeyi fərqli üsulla yenidən hesablamağa ehtiyac var. Belə olduğu təqdirdə, bu mümkündür."
Sonda isə Orban sözlərini belə tamamlayıb:
"Məncə Rusiya bizə real təhlükə yaradacaq qədər güclü deyil. Biz onlardan qat-qat güclüyük. NATO-nun Ukraynada işi yoxdur. Ukrayna NATO üzvü deyil, Rusiya da elə. Mənim vəzifəm bu vəziyyətin belə qalmasını təmin etməkdir."
Qeyd edək ki, Zelenski bildirib ki, Rusiya prezidenti Vladimir Putin alyansı sınağa çəkmək üçün 2030-cu ildən etibarən daha geniş imkanlara sahib ola bilər.
“Bu gün Ukrayna onu dayandırır. Onun ordusunu təkmilləşdirməyə və təlim keçməyə vaxtı yoxdur. Amma 5 ilə vəziyyət dəyişə bilər”- deyə o bildirib.
Ukrayna lideri NATO müttəfiqlərinin 2035-ci ilə qədər müdafiə xərclərini ÜDM-in 5%-i səviyyəsinə çatdırmaq planlarını “çox ləng” adlandıraraq bildirib ki, bu cür gecikmələr Putin üçün fürsətlər yaradır.
İsrail-İran qarşıdurması və Yaxın Şərqdə mümkün müharibənin Ukraynaya təsiri barədə suala cavab verən Zelenski, ABŞ da daxil olmaqla bəzi Qərb tərəfdaşlarının yardımında azalma ehtimalının Ukrayna üçün çətinlik yaradacağını etiraf edib.
Zelenski həmçinin ABŞ prezidenti Donald Trampla münasibətləri barədə danışmaqdan çəkinib, lakin Trampın Putinlə münasibətlərinə toxunaraq onları "dost deyil, qısamüddətli tərəfdaşlar" adlandırıb.