BAKI, AzerVoice

Ötən ilin dekabr ayında Suriyada Əsəd rejiminin devrilməsindən sonra iki milyondan çox suriyalı qaçqın və öz vətəninə qayıdıb.

AzerVoice xəbər verir ki, bu barədə BMT-nin Qaçqınlar üzrə Ali Komissarı Filipp Qrandi X sosial şəbəkə hesabında yazıb.

“Dekabrdan bu yana iki milyondan çox suriyalı qaçqın və didərgin öz evlərinə qayıdıb” - deyə, Qrandi bildirib.

Bu hadisəni o, regiondakı artan gərginlik fonunda ümidverici bir göstərici kimi dəyərləndirib.

“Bir çox qaçqın artıq yurdlarına geri qayıtmaq qərarı verib, lakin bu qayıdışın davamlı olması üçün Suriyanın beynəlxalq dəstəyə ehtiyacı var” - deyə, o əlavə edib.

Qeyd edək ki, 2011-ci ildə Suriyada Əsəd rejiminə qarşı başlayan xalq etirazlarının zorakılıqla yatırılmasından sonra başlayan münaqişə nəticəsində ölkə əhalisinin yarısı ölkə daxilində və ya xaricdə didərgin düşüb. Əhalinin əsas hissəsi İdlib və onun ətrafında yerləşən düşərgələrdə sığınacaq tapıb.

Əlavə edək ki, ötən il dekabrın 8-dən bəri, suriyalılar həm ölkə daxilindən, həm də xüsusilə Livan və Türkiyə kimi qonşu ölkələrdən öz bölgələrinə mərhələli şəkildə qayıtmağa başlayıblar. Lakin infrastrukturun dağılması və ya olmaması, həmçinin ağır iqtisadi vəziyyət əlavə kütləvi qayıdışların qarşısını alır.