BAKI, AzerVoice

Fransa xarici işlər naziri Jan-Noel Barrot Fələstin dövlətinin tanınması ilə bağlı qərarlı olduqlarını bildirib.

AzerVoice xəbər verir ki, Barrot RTL kanalında qatıldığı proqramda Fələstinlə bağlı qiymətləndirmələr edib.

Fransa və Səudiyyə Ərəbistanının həmsədrliyi ilə iyunun 17-20-də Nyu Yorkda keçiriləcək Birləşmiş Millətlər Təşkilatının (BMT) Fələstin konfransında "Fələstin dövlətinin tanınması qarşısındakı maneələri aradan qaldırmaq üçün" öhdəliklər götürəcəklərini bildirən Barrot, bu dövlətin tanınmasının simvolik olmayacağını qeyd edib.

Fransanın BMT Təhlükəsizlik Şurasının daimi üzvü olaraq Fələstin dövlətini tanımaq üçün "xüsusi məsuliyyət" daşıdığını vurğulayan Barrot, "Əgər Fələstin dövlətini tanısaq, bu, nəyisə dəyişdirmək və Fələstin dövlətinin varlığını daha etibarlı etmək olacaq" - deyə vurğulayıb.

Digər tərəfdən, Barrot iyun ayında keçiriləcək konfransda Fələstin dövlətinin tanınması ilə bağlı qərarın qəbul edilib-edilməyəcəyini açıq şəkildə ifadə etməyib və bunun baş verməsi üçün Fransa hökumətinin müəyyən şərtlərinin olduğunu bir daha vurğulayıb.

Barrot bu şərtləri HƏMAS məhbuslarının azad edilərək tərksilah edilməsi, Fələstin administrasiyasından kənarlaşdırılması, işğal rejiminin tanınması və Fələstin Muxtariyyətində islahatların aparılması kimi sadalayıb.