BAKI, AzerVoice
Ukrayna, 2014-cü ildə Rusiya tərəfindən qeyri-qanuni olaraq ilhaq edilən Krımda yerləşən və Rusiya ilə Krımı birləşdirən Kerç körpüsünə son iki ildə üçüncü dəfə hücum təşkil edib.
AzerVoice xəbər verir ki, Ukrayna Təhlükəsizlik Xidməti (SBU) sualtı partlayışı əks etdirən əməliyyatın görüntülərini yayımlayıb.
SBU bildirir ki, əməliyyat aylarla planlaşdırılıb və Moskvanın tammiqyaslı işğalının başlanmasından bu yana üçüncü dəfə körpünün vurulmasına nail olunub.
Qurumun məlumatına görə, TNT ekvivalentində 1.100 kiloqram partlayıcının işə düşməsi nəticəsində körpünün sualtı dayaqları ciddi zədələnib.
Qeyd edək ki, Kerç körpüsü Rusiya ilə ilhaq edilmiş Krımı birləşdirir və Rusiya qoşunlarının Ukraynanın cənubuna və işğal altındakı ərazilərə təchizat üçün həyati əhəmiyyət daşıyan logistika marşrutu hesab olunur.
Xatırladaq ki, Ukrayna bundan əvvəl oktyabr 2022-ci ildə və iyul 2023-cü ildə körpünü iki dəfə vurub, ciddi zərər yetirib, lakin tamamilə dağıda bilməyib.