BAKI, AzerVoice

Qətər tərəfindən ABŞ Prezidenti Donald Trampa hədiyyə edilən Boeing 747-8 təyyarəsinin prezident səviyyəsində istifadəyə uyğunlaşdırılması təxminən 1,5 milyard dollara başa gələcək.

AzerVoice xəbər verir ki, bu barədə "The Washington Post" qəzeti ABŞ Hərbi Hava Qüvvələrindəki mənbələrə istinadla məlumat yayıb.

Məlumata görə, təyyarəyə texniki baxış keçirən ABŞ hərbi mütəxəssisləri onun “çox pis vəziyyətdə saxlanıldığını” və hazırda prezident səviyyəsində istifadəyə yararlı olmadığını bildiriblər. Təyyarənin bütün təhlükəsizlik, rabitə və müdafiə sistemləri ilə təchiz edilməsi üçün Texas ştatındakı L3Harris Technologies hərbi-sənaye zavoduna yönləndirilməsi planlaşdırılıb.

İlkin hesablamalara görə, modernizasiya işləri təxminən 1,5 milyard dollar təşkil edir.

Bununla yanaşı, rəsmi sənədlərdə hələlik təyyarənin ABŞ-a tam şəkildə təhvil verilməsi rəsmiləşdirilməyib. Tramp əvvəllər bu təyyarənin Qətər tərəfindən ABŞ-a hədiyyə edildiyini desə də, Qətər tərəfi sonradan bildirmişdi ki, təyyarənin alınması Tramp administrasiyasının təşəbbüsü ilə baş verib və monarxiya bu təyyarənin gələcək istifadəsinə görə məsuliyyət daşımır.

Nəşr yazır ki, ABŞ administrasiyası bu təyyarənin alınmasını təklif etdikdən sonra Qətər onu simvolik olaraq ABŞ-a təmənnasız təqdim etməyə razılaşıb. Təyyarə artıq bir aydan çoxdur ki, Texasın San-Antonio hava limanında saxlanılır. ABŞ mətbuatında bu təyyarə “uçan saray” kimi təsvir olunur və ABŞ-ın xarici dövlətdən aldığı ən bahalı hədiyyələrdən biri hesab edilə bilər.