Bakı. VOA:
Fransa prezident Emmanuel Makronun gözlənilmədən erkən seçki keçirmək qərarı ölkə birjasını Avropa üzrə birincilik pilləsindən məhrum edib.
VOA xəbər verir ki, Makronun gözlənilmədən erkən seçki keçirmək qərarı ölkədə maliyyə bazarlarına mənfi təsir göstərib, Paris təxminən iki ildir əlində saxladığı Avropanın ən böyük bazar dəyərinə malik birja statusunu Londona təhvil verib.
Sürpriz erkən seçki qərarı ölkənin risk dərəcəsini artmasına səbəb olub və bu, xüsusilə Fransa bank sektoruna mənfi təsir edib.
Belə ki, son günlər səhm bazarında müşahidə edilən dəyər itirmələri ilə Fransa birjasında şirkətlərin bazar dəyəri 3,13 trilyon dollara qədər azalıb və nəticədə 3,18 trilyon dollarlıq bazar dəyəri ilə London Birjası 2 il əvvəl Parisə uduzduğu Avropanın ən böyük birjası ünvanını yenidən geri alıb.
İyunun 9-da Avropa Parlamentinə (AP) keçirilən seçkilərdə ifrat sağçıların ciddi fərqlə birinci olmalarından sona Makron erkən seçki keçirmək qərarına gəlib və bunun nəticəsində Fransa şirkətlərinin bazar dəyərində təqribən 258 milyard dollar azalma ortaya çıxıb.
Ölkədə keçirilən erkən seçkilərin yaratdığı siyasi qeyri-müəyyənlik mühitində Fransa fond bazarının göstəricisi olan CAC 40 indeksi 6 faizdən çox itki ilə 2002-ci ildən bəri ən böyük həftəlik itkisini yaşayıb.
Qeyd edək ki, iyunun 9-da Fransada keçirilən Avropa Parlamenti (AP) seçkilərində ifrat sağçı Milli Birlik (RN) 31,37 faiz səslə böyük fərqlə birinci, prezident Emmanuel Makronun partiyası Rönesans isə 14,60% səslə ikinci olub. AP seçkilərinin nəticələrinin açıqlanmasından sonra Makron parlamenti buraxaraq 30 iyun-7 iyul tarixlərində növbədənkənar seçkilər təyin etmək qərarına gəldiyini bildirmişdi.
