BAKI,VOA, Fərid Mikayılov

İranın xarici işlər naziri Abbas Əraqçi Fransanı insan hüquqları və beynəlxalq hüququ müdafiə etdiyini iddia edərkən ikili standartlardan istifadə etməkdə ittiham edib.

VOA xəbər verir ki, Əraqçinin açıqlaması Fransa və daha 25 ölkənin, həmçinin Avropa İttifaqının xarici siyasət üzrə ali nümayəndəsinin İranda ölüm hökmlərinin icrası ilə bağlı Tehrana ünvanladığı tənqidlərdən sonra səslənib.

İranın xarici işlər naziri Fransanın özünü insan hüquqlarının müdafiəçisi kimi təqdim etməsini rədd edib və Parisin İsrailin Qəzzadakı hərəkətlərinə, eləcə də İrana qarşı hərbi əməliyyatlara dəstəyinin onun mənəvi mövqeyini sarsıtdığını bildirib.

“İnsan hüquqları” və beynəlxalq hüquq məsələlərində dünyaya dərs vermək istəyən ölkələrin əvvəlcə öz mövqelərinə baxmalı olduğunu deyən Əraqçi Fransanın mövqeyini “açıq və utancverici riyakarlıq” adlandırıb.

Əraqçi bildirib ki, Fransanın İsrailin Qəzzadakı hərəkətlərinə dəstəyi və İrana qarşı təcavüzü Parisin beynəlxalq məsələlərdə mənəvi üstünlük iddiasını aradan qaldırıb.

Onun bu reaksiyasına Fransa Xarici İşlər Nazirliyinin İranla bağlı yaydığı bəyanat səbəb olub. Fransa və digər 25 ölkə həmin sənəddə İranda etirazçılara qarşı ölüm hökmlərinin icrasını pisləyib və Tehrandan bu praktikanı dayandırmağı tələb edib.

Bəyanatda həmçinin ölkədə özbaşına saxlanıldığı bildirilən şəxslərin azadlığa buraxılması çağırışı yer alıb.

Əraqçinin sözləri Fransa və İran arasında insan hüquqları, beynəlxalq hüquq və Yaxın Şərqdəki münaqişələr fonunda siyasi fikir ayrılıqlarının daha da kəskinləşdiyini göstərir.