BAKI,VOA,Yusif Şərifzadə

İran Kəşfiyyat Nazirliyi iki fransalı diplomatı ölkə daxilində “gizli fəaliyyət və müdaxilə” əməliyyatında iştirak etməkdə ittiham edib. Nazirlik diplomatların İranın daxili işlərinə müdaxilə məqsədi daşıdığı iddia edilən fəaliyyətlə əlaqəsinin araşdırıldığını bildirib.

VOA xəbər verir ki, İranın dövlət xəbər agentliyi İRNA-nın yaydığı açıqlamada iki diplomatın İran təhlükəsizlik qüvvələrinin başqa iki şübhəli şəxslə bağlı araşdırma apardığı vaxt gizli görüş yerində aşkarlandığı iddia olunub.

İran Kəşfiyyat Nazirliyi araşdırma zamanı götürülən sənədlərin müəyyən şəxslərin müəyyənləşdirilməsi, gizli əlaqələrin yaradılması və İran daxilində, eləcə də ölkədən kənarda əlaqələr şəbəkəsinin qurulmasına yönəlmiş fəaliyyətlərdən xəbər verdiyini bildirib.

Nazirlik həmçinin iddia edib ki, sözügedən fəaliyyətlə əlaqəli müqavilələrdən bəzilərində Fransanın İrandakı keçmiş səfirinin imzası olub.

İran tərəfi bu fəaliyyətlərin xarici müdaxilə məqsədi daşıdığını iddia edib.

Fransa diplomatlarının hansı konkret fəaliyyətlərdə iştirak etdiyi və onların hazırda saxlanılıb-saxlanılmadığı barədə əlavə məlumat verilməyib.

İran Kəşfiyyat Nazirliyinin irəli sürdüyü ittihamların müstəqil şəkildə təsdiqlənmədiyi bildirilir.

İran tərəfi də iddialarını təsdiqləyən konkret sübutlar təqdim etməyib.