BAKI, AzerVoice

Trampın yeni tarif açıqlamalarından sonra Nyu-York Birjası kəskin enişlə bağlanıb, bazarlarda təxminən 3 trilyon dollar dəyər itib.

AzerVoice xəbər verir ki, ABŞ prezidenti Donald Trampın ticarət tarifləri ilə bağlı açıqlamaları investorlar arasında çaxnaşma yaradıb.

Dow Jones, S&P 500 və Nasdaq indeksləri 2020-ci ildən bəri ən böyük gündəlik itkilərini yaşayaraq kəskin düşüb.

Trampın ikitərəfli tarifləri tətbiq etməsi ilə bağlı qərarı qlobal iqtisadiyyatın tənəzzülə sürüklənə biləcəyi qorxularını artırıb. Dow Jones 1700 bənd itirərək 40 545,93 səviyyəsinə enib. S&P 500 indeksi 4,84 faiz, Nasdaq isə 5,97 faiz azalıb.

Bazarın çöküşü fonunda Tramp jurnalistlərə açıqlamasında, “Bazarlar partlayacaq” ifadəsini işlədib. ABŞ Ticarət naziri Hovard Lutnik isə tariflərə qarşı hər hansı güzəştin olmayacağını bildirib.

Tariflər elan edildikdən sonra xüsusilə qlobal təchizat zəncirinə malik şirkətlərin səhmləri ciddi dəyər itirib. Apple-ın səhmləri 9 faizdən çox, Nike-ın səhmləri isə 14 faizdən çox ucuzlaşıb.

Pərakəndə satış sektoru da sərt zərbə alıb. Five Below-un səhmləri 28 faiz, Dollar Tree isə 13 faiz dəyər itirib. “Möhtəşəm Yeddilik” kimi tanınan aparıcı texnologiya şirkətlərinin ümumi bazar dəyəri 800 milyard dollardan çox azalıb.

ABŞ Federal Ehtiyat Sistemi (FED) rəsmiləri yaranmış vəziyyəti yaxından izlədiklərini bildiriblər. FED sədr müavini Filip Cefferson, inflyasiya və əmək bazarının vəziyyətindən asılı olaraq, sərt pul siyasətinin daha uzun müddət davam etdirilə biləcəyini qeyd edib.