BAKI, AzerVoice

ABŞ-da keçirilən sorğunun nəticələrinə görə, iştirakçıların 60 faizi prezident Donald Trampın xarici ölkələrlə ticarət danışıqlarındakı münasibətini bəyənmədiyini bildirib.

AzerVoice xəbər verir ki, Associated Press (AP)-NORC İctimai Əlaqələr Araşdırma Mərkəzi tərəfindən 20-24 mart tarixlərində keçirilən sorğuda 1229 yetkin amerikalı iştirak edib.

İştirakçılar Trampın prezidentliyini, eləcə də qeyri-qanuni immiqrasiya, iqtisadiyyat, ticarət, Rusiya-Ukrayna müharibəsi və İsrail-Fələstin məsələsi kimi müxtəlif siyasətlərə münasibətini qiymətləndiriblər.

Müvafiq olaraq, iştirakçıların 49 faizi Trampın qeyri-qanuni immiqrasiya siyasətlərini dəstəklədiyini, yüzdə 50-si isə dəstəkləmədiyini bildirib.

İştirakçıların 54 faizi Trampın İsrail-Fələstin məsələsində mövqeyini bəyənmədiyini, 44 faizi isə bəyəndiyini bildirib.

Digər tərəfdən, müxtəlif ölkələr Trampın tarif qərarlarına reaksiya verərkən, iştirakçıların 60 faizi ABŞ prezidentinin digər ölkələrlə ticarət danışıqlarındakı münasibətini bəyənmədiyini, 38 faizi isə bəyəndiyini bildirib.

Bundan əlavə, iştirakçıların 56 faizi Trampın Rusiya-Ukrayna müharibəsi ilə bağlı mövqeyini dəstəkləmədiyini, 41 faizi isə dəstəklədiyini bildirib.

Sorğunun nəticələri göstərib ki, respondentlərin 56 faizi ümumilikdə Trampın prezident administrasiyasını bəyənmir, 42 faizi isə bəyənir.