BAKI,AzerVoice

Fransada Dövlət Şurası, Fransa Milli Vəkillər Birliyinin vəkillərə hicab da daxil olmaqla fərqli dini və ayırdedici simgələri qadağan edən qərarına edilən etirazı rədd edərək, qadağanın qüvvədə qalmasına qərar verdi.

AzerVoice xəbər verir ki, Dövlət Şurası vəkillik peşəsini tənzimləyən qanunun 3-cü maddəsinə əsaslanaraq, vəkillərin məcburi şəkildə vahid geyim tərzinə riayət etməli olduğunu və bunun nəticəsində ayırdedici simgələrdən istifadənin də qadağan olunduğunu bəyan edib.

Məhkəmə qərarında qeyd olunub ki, vəkillərin yalnız müştərilərinin hüquqlarını müdafiə etməli olduğu və şəxsi inanc və ya fikirlərini ifadə etməməsinin vacib olduğu vurğulanıb.

Həmçinin bildirilib ki, bütün vəkillərin eyni geyim qaydalarına riayət etməsi məhkəmə proseslərində bərabərliyi təmin edir və bu, ədalətli məhkəmə hüququnun əsas şərtlərindən biridir.

Bu qərar, Fransada dini azadlıqlar və ifadə hüququ ilə bağlı yenidən müzakirələrə səbəb olub. Müxtəlif insan haqları təşkilatları və dini azlıqların nümayəndələri bu qadağanın diskriminasiyaya səbəb olduğunu və fərdi azadlıqları məhdudlaşdırdığını bildirirlər.

Fransa hökuməti isə bu addımın hüquqi neytrallığı qorumaq və məhkəmə sistemində obyektivliyi təmin etmək üçün atıldığını müdafiə edir.