Bakı. AzerPress:
Dünya sülhünü qorumaq Birləşmiş Millətlər Təşkilatının əsas vəzifəsidir.
AzerPress xəbər verir ki, bu sözləri Türkiyə prezidenti Rəcəb Tayyib Ərdoğan Qətərdən qayıdarkən jurnalistlərə açıqlamasında deyib.
"Birləşmiş Millətlər Təşkilatının Baş katibi Antonio Quterreş münaqişənin əvvəlindən bütün tərəflərlə çox sıx əlaqə saxlayır və heç vaxt İsrailə dəstək olduğunu bildirməyib. Quterreşin bütün görüşlərimizdə İsrail zülmünə qarşı mövqeyimizi dəstəkləməsi bizim üçün müsbət haldır. Birləşmiş Millətlər Təşkilatının Baş Assambleyasında 121 ölkənin Fələstinə dəstək olması Fələstinin haqlılığının nə dərəcədə qəbul edildiyinin ən aydın ifadəsidir. Türkiyə olaraq bitərəf ölkələrlə danışıqlar aparmağı hədəfləyirik", - deyə o vurğulayıb.
R.T.Ərdoğan onu da qeyd edib ki, BMT Təhlükəsizlik Şurası öz üzərinə düşən vəzifəni yerinə yetirə bilmir.
"BMT sisteminə yenidən baxılmasından danışmalıyıq. Çox gec olmadan bunu etməliyik. Əks halda, BMT sistemi münaqişənin qarşısını ala bilməyəcək", - deyə o bildirib.
Qeyd edək ki, Qəzza zolağında ölənlərin sayı 16 min 248 nəfərdir.
Xatırladaq ki, oktyabrın 7-də HƏMAS İsrail əleyhinə “Əqsa Tufanı” əməliyyatına başlayıb. Buna cavab olaraq, İsrail Qəzzada hərbi əməliyyatlara başlayıb.