BAKI,VOA, Fərid Mikayılov

İsrailin Baş naziri Benyamin Netanyahu HƏMAS tam silahsızlaşdırılmadan İsrail ordusunun Qəzza zolağındakı mövqelərindən geri çəkilməyəcəyini bəyan edib.

VOA xəbər verir ki, Netanyahu bununla ABŞ Prezidenti Donald Trampın dəstəklədiyi Qəzza razılaşmasına etirazını ifadə edib.

Baş nazirin sözlərinə görə, Tramp administrasiyası HƏMAS-ın silahsızlaşdırılması və Qəzzanın hərbsizləşdirilməsinə nail ola biləcəyini düşünür.

"Onlar bizə layihə göndəriblər, lakin biz onu qəbul etməmişik. Bu, bizim layihəmiz deyil. Mövqeyimizi onlara çatdırmışıq və maraqlarımızı qətiyyətlə müdafiə edirik", – deyə Netanyahu bildirib.

Məlumata görə, ABŞ-ın dəstəklədiyi plan HƏMAS-ın silahları təhvil verməyə başlamasını, İsrailin hərbi əməliyyatları dayandırmasını və Qəzza zolağında nəzarət etdiyi ərazilərdən mərhələli şəkildə çıxmasını nəzərdə tutur.

Plana əsasən, daha sonra bölgədə Beynəlxalq Sabitləşdirmə Qüvvələrinin yerləşdirilməsi, idarəetmə və yenidənqurma işlərinin isə müstəqil Fələstin administrasiyası tərəfindən həyata keçirilməsi planlaşdırılır.

Netanyahu isə bildirib ki, İsrail üçün əsas şərt HƏMAS-ın tam silahsızlaşdırılmasıdır və bu baş vermədən ordunun geri çəkilməsi mümkün deyil.

Qeyd edək ki, İsrail və HƏMAS qarşılıqlı şəkildə bir-birini atəşkəs razılaşmasının şərtlərini pozmaqda ittiham edir.