BAKI,VOA,Yusif Şərifzadə

Yəmənin beynəlxalq səviyyədə tanınan hökuməti İran və husilər qrupunu ölkənin hava məkanını pozmaqda ittiham edib. Rəsmi Səna hökuməti belə addımların ölkənin suverenliyinə qarşı yönəldiyini bildirib və buna uyğun cavab veriləcəyini açıqlayıb.

VOA xəbər verir ki, Yəmənin müdafiə naziri Tahir əl-Aqili İran və onun müttəfiqi hesab edilən husilərin ölkənin hava məkanına müdaxilə etdiyini bildirib. O, baş verənləri Yəmənin suverenliyinin pozulması kimi qiymətləndirərək hökumətin buna uyğun tədbirlər görəcəyini qeyd edib.

Yəmən Prezident Rəhbərlik Şurasının yaydığı açıqlamada ölkə suverenliyinin dəfələrlə pozulduğu bildirilib. Açıqlamada beynəlxalq tərəfdaşların və vasitəçilərin vəziyyətin gərginləşməsinin qarşısını almaq üçün göstərdiyi səylərə baxmayaraq, husilərin yeni İran reysinin qəbulunda israr etdiyi qeyd olunub.

Şuranın açıqlamasında həmin uçuşun mülki aviasiya sahəsində mövcud hüquqi və suveren qaydalardan kənar həyata keçirildiyi iddia olunub. Bildirilib ki, bu addım dövlət institutlarına hörmətsizlik və gərginliyin qarşısını almaq səylərinə açıq etinasızlıqdır.

Prezident Rəhbərlik Şurasının sədri Rəşad Məhəmməd əl-Əlimi husiləri vəziyyətin gərginləşməsinə və bunun Yəmənin təhlükəsizliyi ilə sabitliyinə mümkün təsirlərinə görə tam məsuliyyət daşımaqda ittiham edib.

Husilər 2015-ci ildən etibarən Yəmən hökumətinə qarşı silahlı mübarizə aparırlar. Ölkədə uzun illərdir davam edən qarşıdurma regional güclərin də iştirakı ilə mürəkkəb siyasi və hərbi böhrana çevrilib.