BAKI,VOA,Yusif Şərifzadə

İran Prezidenti Məsud Pezeşkian Rusiya ilə elektrik enerjisi sahəsində əməkdaşlıq imkanlarını müzakirə edib. Tərəflər iki ölkənin elektrik şəbəkələrinin birləşdirilməsi və enerji təminatının gücləndirilməsi məsələlərinə diqqət ayırıblar.

VOA xəbər verir ki, İran Prezidenti Məsud Pezeşkian Rusiyanın energetika naziri ilə görüşündə Rusiyanın cənub bölgələrindən İrana məhdud həcmdə elektrik enerjisi ötürülməsi məsələsini müzakirə edib.

Məlumata görə, görüş zamanı bir neçə enerji layihəsi, o cümlədən İran və Rusiya elektrik şəbəkələrinin birləşdirilməsi planı nəzərdən keçirilib.

İranın dövlətə məxsus elektrik şirkəti “Tavanir”in məlumatına əsasən, ABŞ-ın son zərbələri nəticəsində ölkənin elektrik sisteminə ciddi ziyan dəyib. Bildirilib ki, elektrik şəbəkəsində 2 mindən çox nöqtəyə zərbə endirilib.

Şirkət ötən gün elektrik istehsalı gücünün 4 200 meqavat azaldığını açıqlayıb. Mütəxəssislər bu vəziyyətə yay aylarında artan istilərin də əlavə yük yaratdığını bildirirlər.

İran hökuməti enerji təminatında yaranan çətinlikləri aradan qaldırmaq üçün regional əməkdaşlıq imkanlarını genişləndirməyə çalışır.

Rusiya ilə elektrik əlaqələrinin qurulması planı İranın enerji infrastrukturunun sabitliyinin artırılması istiqamətində atılan addımlardan biri kimi qiymətləndirilir.