BAKI,VOA,Yusif Şərifzadə

Yəməndə fəaliyyət göstərən husilər Səna Beynəlxalq Hava Limanına endirilən zərbəyə cavab olaraq Səudiyyə Ərəbistanının mühüm infrastruktur obyektlərini hədəf ala biləcəklərini bildiriblər.

VOA xəbər verir ki, husilərin siyasi bürosunun üzvü Məhəmməd əl-Buxeyti yerli mediaya açıqlamasında qrupun hücuma cavab tədbirləri görəcəyini deyib.

Məhəmməd əl-Buxeyti bildirib ki, Səna hava limanına qarşı həyata keçirilən əməliyyata cavab olaraq Səudiyyə Ərəbistanının “həyati əhəmiyyət daşıyan infrastrukturu” hədəfə alına bilər.

Husilər daha əvvəl də Səudiyyə Ərəbistanı və bölgədəki digər ölkələrə qarşı raket və pilotsuz uçuş aparatlarından istifadə etməklə hücumlar həyata keçiriblər.

Səna hava limanı ilə bağlı gərginlik Yəməndə vəziyyəti daha da mürəkkəbləşdirib. Yəmənin beynəlxalq səviyyədə tanınan hökuməti hava limanına zərbənin İran təyyarəsinin enişinin qarşısını almaq məqsədi daşıdığını bildirib.

Husilər isə bu addımı pisləyərək cavab verəcəklərini açıqlayıblar. Tərəflər arasında qarşıdurmanın genişlənməsi ilə bağlı beynəlxalq narahatlıq artır.