BAKI,VOA Orxan Qədirzadə

ABŞ Prezidenti Donald Tramp İrana qarşı hərbi əməliyyatların yenidən başladığını rəsmi şəkildə Konqresə bildirib. O, Senat və Nümayəndələr Palatasının rəhbərlərinə ünvanladığı məktubda iyulun 7-də ABŞ Silahlı Qüvvələrinin İran ərazisində yerləşən hədəflərə "müdafiə xarakterli zərbələr" endirdiyini açıqlayıb.

Bu, uzun fasilədən sonra ABŞ-ın İrana qarşı hücumları bərpa etməsinin ilk rəsmi təsdiqi hesab olunur və Ağ evlə Konqres arasında prezidentin qanunverici orqanın razılığı olmadan hərbi əməliyyatları davam etdirmək səlahiyyəti ilə bağlı mübahisələri yenidən gündəmə gətirib.

ABŞ Konqresinin hər iki palatası daha əvvəl Donald Trampın ya İrana qarşı hərbi əməliyyatları dayandırmasını, ya da onların davam etdirilməsi üçün qanunvericilərin razılığını almasını tələb edən qərar qəbul etmişdi.

Bununla belə, Tramp administrasiyası prezidentin Silahlı Qüvvələrin Ali Baş Komandanı kimi Konstitusiyadan irəli gələn səlahiyyətləri çərçivəsində hərəkət etdiyini bildirir.

1973-cü ildə qəbul edilmiş Hərbi Səlahiyyətlər haqqında Qətnaməyə əsasən, 60 günlük müddət başa çatdıqdan sonra Ağ ev hərbi əməliyyatların davam etdirilməsi üçün Konqresin razılığını almalı idi. Lakin Tramp administrasiyası həmin qanunun bu müddəalarının Konstitusiyaya zidd olduğunu müdafiə edir.

İyunun 18-də ABŞ və İran arasında atəşkəs rejiminin uzadılmasını nəzərdə tutan qarşılıqlı anlaşma memorandumu imzalanmışdı. Buna baxmayaraq, iyulun 8-nə keçən gecə Vaşinqton İrana qarşı hava zərbələrini yenidən bərpa edib, Donald Tramp isə atəşkəs rejiminin başa çatdığını elan edib.