BAKI,VOA Orxan Qədirzadə
Birləşmiş Ərəb Əmirlikləri (BƏƏ) Suriyada terrorçu qruplara qarşı keçirilən təhlükəsizlik əməliyyatlarına tam dəstəyini ifadə edib, eyni zamanda ABŞ Prezidenti Donald Trampın Suriyanın terrorizmi dəstəkləyən dövlətlər siyahısından çıxarılması prosesinə başlanılması barədə qərarını müsbət addım kimi qiymətləndirib.
BƏƏ Xarici İşlər Nazirliyinin yaydığı bəyanatda bildirilib ki, ölkə Suriya Ərəb Respublikası ilə tam həmrəylik nümayiş etdirir və təhlükəsizlik orqanlarının İŞİD terror təşkilatı ilə əlaqəli terrorçu qruplaşmaların zərərsizləşdirilməsi istiqamətində həyata keçirdiyi əməliyyatları dəstəkləyir.
Nazirliyin məlumatına görə, əməliyyat nəticəsində qətl, quldurluq və terror təşkilatının maliyyələşdirilməsi ilə məşğul olan terror şəbəkələri ifşa edilib. Həmçinin qruplaşmanın yüksək vəzifəli rəhbərlərindən biri və bir neçə üzvü saxlanılıb.
Bəyanatda vurğulanıb ki, BƏƏ Suriyanın təhlükəsizliyinin, suverenliyinin və sabitliyinin qorunmasına, ölkə vətəndaşlarının və sakinlərinin təhlükəsizliyinin təmin edilməsinə, eləcə də əldə olunan milli nailiyyətlərin müdafiəsinə yönəlmiş bütün tədbirləri qətiyyətlə dəstəkləyir. Nazirlik Suriya təhlükəsizlik orqanlarının peşəkarlığını və terror şəbəkələrinin zərərsizləşdirilməsi istiqamətindəki fəaliyyətini yüksək qiymətləndirib.
BƏƏ bir daha terrorçuluğun və ekstremizmin bütün formalarını qətiyyətlə rədd etdiyini bəyan edərək, dövlətlərin təhlükəsizliyi və sabitliyinə qarşı yönəlmiş bütün fəaliyyətlərə qarşı regional və beynəlxalq əməkdaşlığın gücləndirilməsinin vacibliyini vurğulayıb.
Bununla yanaşı, BƏƏ Xarici İşlər Nazirliyi ABŞ Prezidenti Donald Trampın Suriyanın ABŞ-ın terrorizmi dəstəkləyən dövlətlər siyahısından çıxarılması prosesinin başlanacağını elan etməsini də alqışlayıb.
Nazirlik bu addımın Suriyanın bərpası və yenidən qurulması prosesinə mühüm töhfə verəcəyini, iqtisadiyyatın canlanması və investisiyaların cəlb edilməsi üçün yeni imkanlar yaradacağını, həmçinin Suriyanın qlobal iqtisadi sistemə inteqrasiyasını sürətləndirəcəyini bildirib.
BƏƏ bəyan edib ki, bu qərar Suriyada təhlükəsizliyin, sabitliyin və rifahın möhkəmlənməsinə xidmət edəcək.
Nazirlik sonda BƏƏ-nin Suriya xalqının təhlükəsizlik, sabitlik, dinc birgəyaşayış və davamlı inkişafla bağlı gözləntilərinin reallaşdırılmasına yönəlmiş bütün beynəlxalq təşəbbüsləri dəstəkləməyə davam edəcəyini vurğulayıb.