BAKI,VOA Nailə Babazadə

Bəhreyn Krallığında fəaliyyət göstərən Ali Cinayət Məhkəməsi milli təhlükəsizliyə təhdid yaradan fəaliyyətlərlə bağlı genişmiqyaslı məhkəmə prosesini yekunlaşdırıb.

VOA xəbər verir ki, məhkəmənin qərarı ilə İran İslam İnqilabı Keşikçiləri Korpusu (SEPAH) ilə əlbir olaraq strateji əhəmiyyətli obyektləri izləməkdə və fotoşəkillərini çəkməkdə təqsirli bilinən iki əfqan və üç Bəhreyn vətəndaşına ömürlük həbs cəzası verilib. Prokurorluq xarici düşmən qurumlarla əməkdaşlığın dövlət əleyhinə yönəlmiş ən ağır cinayətlərdən biri olduğunu bəyan edib.

Eyni zamanda, İranın Bəhreynə qarşı həyata keçirdiyi hücumların görüntülərini çəkən, paylaşan və bu hücumları açıq şəkildə dəstəkləyən daha 25 nəfər 10 ilədək həbs cəzasına məhkum edilib. Qeyd edək ki, bu hökmlərdən bir gün əvvəl Bəhreyn hökuməti "İranın düşmənçilik hərəkətlərini dəstəkləyən" 69 nəfərin vətəndaşlığını ləğv etmişdi. Regional müharibənin gərginləşdiyi bir dövrdə çıxarılan bu qərarlar Krallığın daxili təhlükəsizliyi qorumaq istiqamətində atdığı qətiyyətli addımlar kimi qiymətləndirilir.