BAKI,VOA,Yusif Şərifzadə

Fələstin Qızıl Aypara Cəmiyyəti Qəzza zolağından 40 xəstənin və onları müşayiət edən 62 nəfərin müalicə məqsədilə xaricə təxliyə olunduğunu açıqlayıb.

VOA xəbər verir ki, təşkilatın yaydığı məlumata görə, xəstələr və onları müşayiət edən şəxslər əvvəlcə cəmiyyətə məxsus Əl-Məvasi səhra hospitalında qəbul edilərək təxliyəyə hazırlanıblar.

Daha sonra onlar təcili tibbi yardım avtomobilləri ilə Ümumdünya Səhiyyə Təşkilatı və aidiyyəti qurumların əlaqələndirməsi çərçivəsində Rəfah quru sərhəd keçid məntəqəsinə çatdırılıblar.

Fələstin Qızıl Aypara Cəmiyyəti bildirib ki, Qəzzanın səhiyyə sistemi ağır çətinliklərlə üzləşməkdə davam edir.

Açıqlamada qeyd olunur ki, xəstəxanalar İsrailin hərbi əməliyyatları və bölgəyə tətbiq edilən blokada səbəbindən ciddi təzyiq altında fəaliyyət göstərir.

Təşkilat səhiyyə müəssisələrinin məhdud imkanlarla xidmət göstərdiyini və tibbi yardımın təşkilində böyük problemlərin yaşandığını vurğulayıb.

Qəzzada davam edən qarşıdurma səbəbindən ağır vəziyyətdə olan xəstələrin bölgədən çıxarılması beynəlxalq təşkilatların iştirakı ilə davam etdirilir.