BAKI,VOA, Nailə Babazadə
Suriya Prezidenti Əhməd Əş-Şəraa rəsmi səfər çərçivəsində Səudiyyə Ərəbistanına gəlib. Suriya liderini Ciddə şəhərindəki Kral Əbdüləziz Beynəlxalq Hava Limanında Məkkə bölgəsinin vitse qubernatoru şahzadə Səud bin Mişal bin Əbdüləziz qarşılayıb.
VOA xəbər verir ki, səfər proqramı çərçivəsində Əhməd Əş-Şəraanın Səudiyyə Ərəbistanının vəliəhd şahzadəsi və Baş naziri Məhəmməd bin Salman ilə görüşü planlaşdırılır. Suriyanın rəsmi xəbər agentliyi SANA tərəfindən yayılan məlumata görə tərəflər ikitərəfli münasibətlərin möhkəmləndirilməsi və ortaq maraq kəsb edən regional məsələlər ətrafında geniş fikir mübadiləsi aparacaqlar.
Suriya Prezidentinin Səudiyyə Ərəbistanına bu səfəri onun Körfəz ölkələrinə başladığı genişmiqyaslı turunun tərkib hissəsidir. Ekspertlər bu diplomatik addımları Suriyanın regiondakı ərəb dövlətləri ilə əlaqələrini yenidən canlandırmaq və iqtisadi əməkdaşlığı gücləndirmək cəhdi kimi qiymətləndirirlər. Səfər çərçivəsində həmçinin regional təhlükəsizlik və humanitar məsələlərin də müzakirə olunacağı gözlənilir.