BAKI,VOA, Nailə Babazadə

Suriya Ümumi Sərhəd Keçid Məntəqələri və Gömrük İdarəsinin bəyanatına əsasən, Yarubiyə-Rabiə sərhəd-keçid məntəqəsinin rəsmi açılış mərasimi keçirilib.

VOA xəbər verir ki,tədbirdə Suriya tərəfindən Gömrük İdarəsinin rəhbəri Kuteybə Bədəvi, Prezident Administrasiyasının nümayəndəsi general Ziyad əl-Ayiş və digər rəsmi şəxslər, İraq tərəfindən isə Sərhəd Keçid Məntəqələri Qurumunun rəhbəri Ömər əl-Vailinin başçılıq etdiyi nümayəndə heyəti iştirak edib.

Görüşlər zamanı tərəflər sərhəd qapılarında birgə fəaliyyətin gücləndirilməsi, keçidlərin asanlaşdırılması və ticarət dövriyyəsinin artırılması məsələlərini müzakirə ediblər. Mərasimdən dərhal sonra sərhəddən qarşılıqlı gediş-gəliş bərpa olunub. Sərhəd qapısının fəaliyyətə başlamasının regionda iqtisadi hərəkətliliyi artıracağı və humanitar əlaqələri gücləndirəcəyi gözlənilir.

Suriyanın Həsəkə vilayəti ilə İraqın Ninova vilayəti arasında yerləşən bu strateji məntəqə 2013-cü ildə İŞİD terror təşkilatının nəzarətinə keçmiş, daha sonra isə YPG tərəfindən ələ keçirilərək fəaliyyəti dayandırılmışdı. Sərhəd qapısı 29 yanvar 2026-cı ildə Suriya hökuməti ilə YPG arasında əldə olunmuş hərbi və inzibati inteqrasiya, həmçinin neft resurslarının və sərhəd məntəqələrinin təhvil verilməsini nəzərdə tutan saziş çərçivəsində rəsmi Dəməşqə təhvil verilib.

Bununla da Yarubiyə-Rabiə keçidi Deyrizordakı Əl-Bukemal-Əl-Qaim məntəqəsindən sonra Suriyanı İraqa bağlayan ikinci rəsmi dövlət sərhədi statusunu bərpa edib.