BAKI,VOA, Nailə Babazadə
İsrail hərbi qüvvələri Qüneytra vilayətinin mərkəzi hissəsində yerləşən Ruvayhinə kəndinə daxil olaraq bir Suriya vətəndaşını saxlayıblar.
VOA xəbər verir ki, Suriya Ərəb Xəbər Agentliyinin (SANA) məlumatına görə, bazar günü axşam saatlarında iki "Humvee" tipli zirehli maşınla kəndə daxil olan İsrail hərbçiləri həmin şəxsi yaxınlıqdakı hərbi mövqelərə aparıblar.
Şənbə günü isə İsrail qüvvələri Qüneytra vilayətinin cənubundakı Kudna kəndinə basqın edərək iki sakini saxlayıb naməlum istiqamətə aparıblar. Suriya hökuməti İsrailin ölkənin cənub ərazilərinə müdaxilələrini, aparılan həbsləri və torpaqların zəbt edilməsini kəskin şəkildə qınayaraq, bu hərəkətlərin 1974-cü il Qoşunların Ayrılması sazişini pozduğunu bəyan edib.
Rəsmi Dəməşq İsrail qüvvələrinin Suriya ərazisindəki varlığının qanunsuz olduğunu və beynəlxalq hüquqa görə bütün bu tədbirlərin heç bir hüquqi qüvvəyə malik olmadığını vurğulayıb.