İsrail Baş nazirinin həyat yoldaşı Sara Netanyahu müxalifət liderlərindən birinin HƏMAS-ın 7 oktyabr 2023-cü il hücum planından əvvəlcədən xəbərdar olduğunu iddia edib. "Agence France-Presse" (AFP) xəbər verir ki, bu bəyanat İsrail müxalifətində kəskin qəzəb doğurub və 27 oktyabrda keçirilməsi planlaşdırılan parlament seçkilərinə iki aydan az vaxt qalmış ölkədəki dərin siyasi qütbləşməni yenidən üzə çıxarıb.

İsrailin "14-cü Kanal" televiziyasında yayımlanan müsahibəsində Sara Netanyahu İsrail ordusunun Baş Qərargah rəisinin sabiq müavini və sol-mərkəzçi "Demokratlar" partiyasının lideri Yair Qolana hücum edib. O bildirib ki, 7 oktyabr 2023-cü ildə "Baş nazir də daxil olmaqla heç kimin heç nədən xəbəri olmadığı bir vaxtda" Qolan artıq sübh saatlarından etibarən geyinmiş və tam hazır vəziyyətdə idi.

İsraildə 27 Oktyabr seçkiləri - Liberal demokratiya ilə dindar-mühafizəkar model arasında tarixi seçim olacaq

Yair Qolanın partiyası Sara Netanyahunun bu sözlərini kəskin pisləyərək onu "alçaq və çaşdırıcı" bəyanat adlandırıb.

"General-mayor Yair Qolana qarşı konspiroloji nəzəriyyələr yaymaq və onun 7 oktyabrdakı qəhrəmanlığına ləkə yaxmaq qırmızı xəttin keçilməsidir və dəlilik həddinə çatmaqdır".-deyə o bildirib.

Sabiq Baş Qərargah rəisi və Netanyahunun əsas rəqiblərindən biri olan Qadi Ayzenkot da Baş nazirin xanımının irəli sürdüyü fikirləri "ağılsız xəyanət nəzəriyyəsi" adlandırıb. Ayzenkot vurğulayıb ki, bu cür çıxışlar yalnız nifrəti qızışdırmaq və Netanyahunun hakimiyyətini uzatmaq məqsədi daşıyır.

İsraildə parlament seçkilərində əsas iddiaçılar kimlərdir?

Sara Netanyahunun ittihamları İsrailin siyasi dairələrində yayılan konspiroloji fikirləri əks etdirir. Avqust ayında "13-cü Kanal" tərəfindən keçirilən rəy sorğusuna əsasən, israillilərin 40 faizi, hakim sağçı koalisiyanın tərəfdarlarının isə 63 faizi 7 oktyabr hücumunun arxasında "daxili xəyanətin" dayandığına inanır.

İsrail tarixində ən uzun müddət hakimiyyətdə qalan və özünü daim ölkə təhlükəsizliyinin təminatçısı kimi təqdim edən Binyamin Netanyahu isə hücuma görə məsuliyyəti üzərindən atmağa davam edir və təhlükəsizlik rəsmilərinin onu vaxtında yuxudan oyatmalı olduğunu iddia edir.

Rəsmi İsrail rəqəmlərinə əsaslanan AFP-nin hesablamalarına görə, 7 oktyabr hücumu nəticəsində 1221 nəfər həlak olub və 251 nəfər Qəzza zolağına girov aparılıb. Qəzzada fəaliyyət göstərən və məlumatları BMT tərəfindən etibarlı sayılan Səhiyyə Nazirliyinin açıqlamasına görə isə, İsrailin Qəzzada apardığı müharibə nəticəsində 73 mindən çox insan həyatını itirib.