BAKI,VOA, Nailə Babazadə

Səudiyyə Ərəbistanının Müdafiə Nazirliyi cümə günü səhər saatlarından etibarən 26 pilotsuz uçuş aparatının (PUA) qarşısının alındığını və məhv edildiyini təsdiqləyib. Eyni zamanda Küveyt və Birləşmiş Ərəb Əmirlikləri (BƏƏ) hakimiyyət orqanları da raket və PUA təhdidləri ilə mübarizə apardıqlarını bildiriblər.

VOA xəbər verir ki,Küveyt Neft Korporasiyasının "Mina Əl-Əhmədi" limanındakı neft emalı zavodu yenidən İranın PUA hücumlarına məruz qalıb və nəticədə müəssisənin bir neçə bölməsində yanğın baş verib. Rəsmi UNA agentliyinin məlumatına görə, yanğınsöndürənlər alovu nəzarətə almağa çalışır, ehtiyat tədbiri olaraq bəzi bölmələr fəaliyyətini dayandırıb. Xəsarət alanlar barədə məlumat yoxdur.

Bəhreyn Daxili İşlər Nazirliyi isə "İran təcavüzü" kimi qiymətləndirdiyi hücumdan qalan qəlpələrin anbarda yanğına səbəb olduğunu, lakin yanğının nəzarətə alındığını açıqlayıb. Səudiyyə Ərəbistanı Müdafiə Nazirliyinin məlumatına görə, PUA-ların əksəriyyəti krallığın əsas neft emalı zavodlarının yerləşdiyi Şərq vilayəti üzərində vurulub.

Bu yeni hücum dalğası İranın Körfəz enerji infrastrukturuna qarşı kampaniyasını gücləndirməsindən sonraya təsadüf edir. Fevralın 28-dən bəri Səudiyyə Ərəbistanını hədəf alan PUA-ların ümumi sayı 503-ə çatıb. Bundan əlavə, eyni dövr ərzində krallığın hava hücumundan müdafiə sistemləri 42 ballistik raket və 7 qanadlı raketi zərərsizləşdirib.