BAKI,VOA,Yusif Şərifzadə

Küveyt Neft Korporasiyası ölkənin neft sektoruna aid mühüm obyektlərdən birinin İranın təkrar hücumlarına məruz qaldığını açıqlayıb. Hadisə nəticəsində bir neçə nəfər yaralanıb və obyektə ciddi maddi ziyan dəyib.

VOA xəbər verir ki, Küveyt Neft Korporasiyasının bəyanatında hücumlar “qəddar” kimi qiymətləndirilib. Yaralılara tibbi yardım göstərildiyi, təhlükəsizlik məqsədilə obyektin boşaldıldığı bildirilib.

Açıqlamaya əsasən, hücumun nəticələrinin aradan qaldırılması və ərazidə təhlükəsizliyin təmin olunması üçün aidiyyəti dövlət qurumları ilə birgə tədbirlər görülür.

Küveytin rəsmi xəbər agentliyinin yaydığı məlumata görə, hücum nəticəsində neft obyektində genişmiqyaslı maddi itkilər qeydə alınıb. Zərərin dəqiq həcmi və yaralıların sayı barədə əlavə məlumat verilməyib.

İranın Körfəz ölkələrinin enerji və infrastruktur obyektlərinə yönələn son hücumları bölgədə təhlükəsizlik narahatlığını daha da artırıb. Küveytdə neft obyekti ilə yanaşı, digər mühüm infrastruktur sahələrinin də hücumlara məruz qaldığı bildirilir.

Mütəxəssislər enerji obyektlərinə hücumların davam etməsinin neft hasilatı, ixrac marşrutları və dünya bazarındakı qiymətlər üçün əlavə risklər yarada biləcəyini bildirirlər. Son gərginlik fonunda neft qiymətlərində artım müşahidə olunub.