BAKI, VOA, Nailə Babazadə

İsrail ordusunun Livanın müxtəlif bölgələrinə, xüsusilə ölkənin şərqindəki Bekaa vadisinə təşkil etdiyi hava hücumları nəticəsində mülki itkilər artmaqda davam edir.

VOA xəbər verir ki, Livanın rəsmi NNA agentliyinin məlumatına görə, Bekaa bölgəsinin Sehmar qəsəbəsində 4 yaşayış evinin hədəf alınması nəticəsində 4 nəfər həyatını itirib. Eyni zamanda, Nebatiye şəhərində bir binaya endirilən zərbə yaxınlıqdakı Mülki Müdafiə Mərkəzinə də ziyan vurub və nəticədə 11 xilasedici yaralanıb. Paytaxt Beyrutun Balata küçəsində yerləşən yaşayış binasına endirilən hava zərbələri də şəhərdə ciddi dağıntılara səbəb olub.

İsrail ordusunun sözçüsü Aviçay Adrae sosial media vasitəsilə yeni xəbərdarlıqlar yayaraq Nebatiye, Sur və digər cənub kəndlərində Hizbullahın fəaliyyət göstərdiyini iddia edib və sakinlərdən dərhal evlərini tərk edərək Zehrani çayının şimalına getmələrini tələb edib. Bu təxliyə əmrləri fonunda Livanın cənubunda humanitar böhran dərinləşir.

Livan Səhiyyə Nazirliyinin 17 mart 2026-cı il tarixli son hesabatına əsasən, martın 2-dən bəri davam edən genişmiqyaslı hücumlarda ölənlərin sayı 912-yə, yaralıların sayı isə 2221-ə yüksəlib. Həlak olanlar arasında 111 uşağın olduğu bildirilir. Livan hökumətinin Fəlakətlərin İdarə Olunması Mərkəzi isə İsrailin quru və hava əməliyyatları səbəbindən ölkə daxilində məcburi köçkün düşən insanların sayının rəsmən 1 milyon nəfəri keçdiyini elan edib.

Xatırladaq ki, fevralın 28-də ABŞ və İsrailin İrana qarşı başlatdığı hərbi kampaniyadan sonra Hizbullahın cavab zərbələrinə reaksiya olaraq İsrail ordusu martın əvvəlindən etibarən Livanda hava zərbələrini intensivləşdirib və martın 16-dan etibarən ölkənin cənubunda quru əməliyyatlarına başladığını bəyan edib.