BAKI,VOA Nailə Babazadə

İsrail ordusunun 17 apreldə qüvvəyə minən atəşkəs razılaşmasına baxmayaraq, Livanın cənubundakı müxtəlif yaşayış məntəqələrinə təşkil etdiyi şiddətli hücumlarda həlak olanların sayı 15-ə çatıb.

VOA xəbər verir ki, Livanın rəsmi NNA agentliyinin məlumatına görə, İsrail ordusunun gün ərzində həyata keçirdiyi hava zərbələri nəticəsində ciddi itkilər qeydə alınıb. Livan Səhiyyə Nazirliyi bildirib ki, günortadan əvvəl Cebşit, Tulin və Haruf qəsəbələrinə təşkil edilən hücumlarda 2-si uşaq olmaqla 9 nəfər həyatını itirib, 23 nəfər isə yaralanıb.

Bundan başqa, axşam saatlarında Bestiyet qəsəbəsində 2, Kana qəsəbəsində 2, günorta saatlarında isə Şəhhabiyyə qəsəbəsində daha 2 nəfər İsrail bombardmanlarının qurbanı olub.

Xatırladaq ki, İsrail ordusu martın 2-dən etibarən Livana qarşı genişmiqyaslı hava və quru əməliyyatlarına başlayaraq ölkənin cənubundakı bir çox ərazini işğal edib. Bu müddət ərzində 1 milyondan çox insan didərgin düşüb, 2500-dən çox livanlı isə həlak olub.

ABŞ Prezidenti Donald Trampın vasitəçiliyi ilə 17 apreldə əldə olunan və 10 günlük nəzərdə tutulan keçici atəşkəsin müddəti daha 3 həftə uzadılsa da, bölgədə sabitlik təmin olunmayıb. Atəşkəs rejiminə rəğmən İsrail ordusunun yaşayış binalarını dağıtması və hücumlarını davam etdirməsinə cavab olaraq, Hizbullahın da İsrail bölmələrini hədəf aldığı bildirilir.