BAKI, VOA, Nailə Babazadə

İsrail ordusunun gecə saatlarından başlayaraq Livanın müxtəlif nöqtələrinə təşkil etdiyi hava hücumları nəticəsində insan itkiləri kəskin artıb.

VOA xəbər verir ki, Livanın rəsmi NNA agentliyinin yaydığı məlumata görə, son zərbələr nəticəsində həyatını itirənlərin ümumi sayı 23 nəfərə yüksəlib.

Hücumların ən ağır nəticəsi Sur şəhərinin Burç Kalavay bölgəsində qeydə alınıb. İsrail döyüş təyyarələrinin buradakı tibb müəssisəsini hədəf alması nəticəsində 12 səhiyyə işçisi həyatını itirib. Livan Səhiyyə Nazirliyi tibbi personalın hədəf alınması ilə bağlı ilkin rəqəmləri təsdiqləyərək hadisəni kəskin pisləyib.

Eyni zamanda, Livanın cənubundakı Hara Sayda bölgəsində bir yaşayış binasına endirilən zərbə 4 nəfərin ölümünə səbəb olub. Nebatiyyə ilinin Rahibələr məhəlləsində həyata keçirilən bombardman zamanı isə 7 nəfər ölüb, çox sayda sakin yaralanıb. Taybe qəsəbəsində də bir evin hədəf alındığı bildirilsə də, həmin hücumda xəsarət alanların olmadığı qeyd edilib.

Bölgədəki gərginlik artdıqca mülki infrastrukturun və tibb müəssisələrinin zərər görməsi humanitar vəziyyəti daha da pisləşdirir.