BAKI, AzerVoice, Nailə Babazadə

İsrailin maliyyə naziri Betsalel Smotriç Baş nazir Benyamin Netanyahunu ABŞ-ın rəhbərlik etdiyi və Donald Trampın Qəzza planını dəstəkləyən koordinasiya mərkəzini bağlamağa çağırıb.

AzerVoice xəbər verir ki, ifrat sağçı nazir Kiryat Qat şəhərində yerləşən Mülki-Hərbi Koordinasiya Mərkəzinin (CMCC) dərhal ləğv edilməsinin vaxtının çatdığını bildirib. Smotriç bu mərkəzdə təmsil olunan Britaniya və Misir kimi ölkələrin İsrailə qarşı düşmən mövqe tutduğunu və ölkənin təhlükəsizliyinə zərbə vurduğunu iddia edərək onların qurumdan kənarlaşdırılmasını tələb edib. Qeyd edək ki, sözügedən mərkəz ötən ilin oktyabrında Trampın Qəzza müharibəsini bitirmək planı çərçivəsində humanitar yardımları və müharibədən sonrakı planlaşdırmanı idarə etmək üçün yaradılıb.

İşğal altındakı İordan çayının qərb sahilində yeni yəhudi yaşayış məskəninin açılışında çıxış edən Smotriç Həmasa tərksilah olmaq və ölkəni tərk etmək üçün çox qısa vaxt verilməli olduğunu vurğulayıb. O İsrailin Qəzza üzərində tam nəzarəti təmin etməli olduğunu və fələstinlilərin bölgədən köçürülməsinin təşviq edilməli olduğunu müdafiə edib. Nazir Trampın silahı yerə qoyan Həmas üzvlərinə amnistiya nəzərdə tutan planına qarşı çıxaraq "tam qüvvə ilə" hücumun tərəfdarı olduğunu bildirib.

Xatırladaq ki, oktyabr ayında qüvvəyə minən atəşkəs razılaşmasından sonra Qəzzada gərginlik davam edir. Atəşkəs dövründə baş verən toqquşmalarda 460-dan çox fələstinli və üç İsrail əsgəri həyatını itirib. Ağ Ev isə Trampın planının artıq Qəzzanın demilitarizasiyası və yenidən qurulmasını nəzərdə tutan ikinci mərhələyə keçdiyini elan edib.