BAKI, AzerVoice, Nailə Babazadə
Qəzza zolağının cənubundakı Xan Yunis şəhərində HƏMAS-ın yüksək rütbəli polis zabiti silahlı hücum nəticəsində öldürülüb.
AzerVoice xəbər verir ki, HƏMAS-a bağlı Daxili İşlər Nazirliyinin yaydığı məlumata görə, naməlum şəxslər hərəkətdə olan avtomobildən atəş açaraq Xan Yunis cinayət axtarış şöbəsinin rəisi Mahmud əl-Astalı qətlə yetiriblər. HƏMAS rəhbərliyi bu hücumda "İsrail əməkdaşlarını" ittiham edib.
Hücumun məsuliyyətini Xan Yunisin şərqində, İsrailin nəzarəti altındakı bölgədə fəaliyyət göstərən anti-HƏMAS qruplaşmasının lideri Hüsam əl-Astal öz üzərinə götürüb. O, sosial şəbəkə hesabında paylaşdığı videoda HƏMAS ilə əməkdaşlıq edənləri hədələyərək hücumların davam edəcəyini bildirib. İsrail hərbi rəsmiləri isə ərazidə hər hansı əməliyyatdan xəbərsiz olduqlarını bəyan ediblər.
Qəzzada artan daxili gərginlik və atəşkəs rejimi
Son zamanlar Qəzzada kiçik miqyaslı anti-HƏMAS silahlı qruplarının ortaya çıxması hərəkat üzərindəki təzyiqi artırır. Bu qruplar əsasən İsrailin nəzarətində olan ərazilərdə fəaliyyət göstərdikləri üçün yerli əhali tərəfindən rəğbətlə qarşılanmırlar. İsrailin Baş naziri Benyamin Netanyahu hələ iyun ayında verdiyi açıqlamada bəzi yerli klanları HƏMAS-a qarşı aktivləşdirdiklərini etiraf etmişdi.
Qeyd edək ki, 2025-ci ilin oktyabrından qüvvəyə minən atəşkəs rejiminə baxmayaraq, tərəflər arasında vaxtaşırı toqquşmalar baş verir. Atəşkəsdən bəri davam edən insidentlər nəticəsində 440-dan çox fələstinli və 3 İsrail əsgəri həyatını itirib.
Həmçinin bazar ertəsi günü Xan Yunis mərkəzi yaxınlığında İsrailə məxsus dronun zərbəsi nəticəsində daha 3 nəfərin öldüyü bildirilir. 7 oktyabr 2023-cü ildən bəri davam edən müharibədə ümumilikdə 71 mindən çox fələstinli həyatını itirib.