BAKI, AzerVoice, Nailə Babazadə

Birləşmiş Millətlər Təşkilatının rəsmiləri bildiriblər ki, Qəzzada güclü yağışlar, su basqınları və soyuq hava humanitar böhranı daha da ağırlaşdırır və bölgəyə daha çox yardımın çatdırılması üçün məhdudiyyətlərin təcili şəkildə aradan qaldırılması vacibdir.

AzerVoice xəbər verir ki, bu barədə BMT-nin Humanitar İşlər üzrə Baş katib müavini və Təcili Yardım Koordinatoru Tom Fletcher sosial media hesabında paylaşım edib.

“Qəzzadakı fələstinlilər son yağışlardan sonra üşüyür və islanmış vəziyyətdədirlər. Sel suları yüksəlir, insanların az miqdarda olan əşyaları da məhv olur, ümidsizlik artır.” - deyə paylaşımda qeyd edilir.

Fletcher qeyd edib ki, BMT və tərəfdaş qurumlar yardım üçün hərəkətə keçib, lakin daha çox dəstəyə ehtiyac var.

“Daha çox yardımın bölgəyə daxil ola bilməsi üçün qalan məhdudiyyətlər təcili şəkildə aradan qaldırılmalıdır.” - deyə o qeyd edib.

BMT Baş katibinin sözçü müavini Fərhan Haq təşkilatın gündəlik brifinqində bildirib ki, BMT-nin Humanitar İşlərin Koordinasiyası Ofisi (OCHA) yağışlardan zərər görən ailələrə çadır, örtük və digər əsas ləvazimatların paylanmasını davam etdirir.

Haq, həmçinin BMT-nin Yaxın Şərq Sülh Prosesi üzrə Xüsusi Koordinatorluğunun (UNSCO) işğal altındakı Fələstin əraziləri üçün humanitar yardım fondundan Qəzzadakı həyati əməliyyatlara dəstək məqsədilə 18 milyon dollar ayırdığını açıqlayıb.

O əlavə edib ki, güclü yağış və qış şəraiti Qəzzada onsuz da çətin olan həyat şərtlərini daha da ağırlaşdırır və ayrılan bu vəsait ərzaq, su, səhiyyə və sığınacaq kimi əsas ehtiyaclara yönəlmiş 30-dan çox layihənin həyata keçirilməsini mümkün edəcək.